Bojoviç: “...gözləmək lazımdır”

"Birinci oyunun nəticəsi bizə və "Qarabağ"a təsir göstərmişdi. İlk hissə maraqlı keçmədi. Fasilədən sonra oyun daha yaxşı idi. Bizim də, "Qarabağ"ın da qol epizodları var idi. Bu oyunda əvvəlki görüşlərdə özünü göstərmək imkanı olmayanlara şans verdik".

Futbolxeber.az saytının məlumatına görə bu sözləri "Neftçi"nin baş məşqçisi Miodraq Bojoviç Azərbaycan Kubokunun yarımfinal mərhələsinin "Qarabağ"la cavab qarşılaşmasından sonra (1:4) keçirilmiş mətbuat konrfansında deyib.

Daha sonra monteneqrolu mütəxəssis jurnalistlərin suallarını cavablandırıb:

- Ağadaş Salyanski haqda fikriniz necədir?

- Biz onu əsas heyətə götürməyə cəhd edirik. Bu gün yaxşı oynadı, yaxşı ötürmələri var idi. Sevinirəm ki, "Neftçi"nin bu cür yetirməsi var və inanıram ki, faydalı olacaq.

- Rəqib oyunçular "Neftçi"nin cərimə meydançasına asanlıqla daxil olurlar. Müdafiədəki problemlər nə vaxt həll olunacaq?

- Bu, tək müdafiəçilərlə bağlı məsələ deyil. Bütün komanda olaraq yetərincə yaxşı müdafiə olunmuruq. "Zirə" ilə görüşdəki nəticə də mənim üçün sürpriz oldu. Çünki meydanda çox idik, amma uduzduq. Çempionatda 5 oyunumuz var. İstədiyimiz yeri tutmaq üçün əlimizdən gələni edəcəyik.

- Siz yeni baş məşqçi təyin olunanda sosial şəbəkələrdə azarkeşlərlə müzakirələr zamanı deyirdim ki, Miodraq Bojoviç yaxşı məşqçidir və “Neftçi”ni düzəldəcək. İndi azarkeşlər məndən soruşurlar ki, bəs nə oldu? Mənim yerimdə olsaydınız, onlara nə cavab verərdiniz?

- Çempionatın sonunu gözləmək lazımdır.