Xabi Alonso: "Geridönüş etmək asan olmadı"

"Bayer"in baş məşqçisi Xabi Alonso Avropa Liqasının 1/8 final mərhələsində "Qarabağ"la cavab görüşündən sonra (3:2, ilk matç - 2:2) mətbuat konfransında iştirak edib.

Futbolxeber.az saytının məlumatına görə, ispan mütəxəssis 1/4 finala adladıqları üçün çox xoşbəxt olduğunu söyləyib: "Hesab 2:2 olanda sonra komandanın daha çox istəkli olduğunu gördüm. Qol buraxdıqdan sonra geri dönüş asan olmadı. Amma oyunçular yaxşı çıxış etdilər. Patrik Şikin son qolu da əla oldu. Əlbəttə ki, mərhələni keçdiyimiz üçün çox şadam. Hamımız eyni gəmidəyik və komanda ruhu bu mövsüm ən vacib şeydir. Mübarizə aparmaq istəyirik. Görürəm ki, komandada inam və aclıq var. Bu mənim üçün çox xoşdur. Frimponqun ilk qolundan sonra komandanın çox istəkli olduğunu gördüm".

Qeyd edək ki, sabah Avropa Liqasının 1/4 final mərhələsinin püşkatma mərasimi keçiriləcək. Mərasim Bakı vaxtı ilə saat 16:00-da başlayacaq. Burada "Bayer"in də rəqibinin adına aydınlıq gələcək.