Miodraq Bojoviç: "Bu heyətlə hədəfə çata bilərik”

"Maraqlı görüş alındı. Hər iki tərəfin fərqlənmək üçün yaxşı imkanları var idi”.

Futbolxeber.az saytının məlumatına görə, bu sözləri “Neftçi”nin baş məşqçisi Miodraq Bojoviç Azərbaycan Premyer Liqasının 24-cü turunda “Turan Tovuz”a qarşı keçirilən oyundan sonra deyib.

Monteneqrolu mütəxəssis 1:1-lik heç-heçəni belə şərh edib: “Hər iki hissənin əvvəlində daha yaxşı çıxış etdik. Lakin hesabı açdıqdan sonra oyunumuzda problemlər yarandı. Rəqib təzyiq etməyə başladı. Bir neçə qol epizodları oldu. Hətta "Turan Tovuz" qələbə qazana da bilərdi".

O, ilk dəfə səfər etdiyi Tovuzda təzyiq hiss etmədiyini bildirib: “Azarkeşlər komandalarını çox gözəl dəstəkəyirdi, təbiət də gözəl idi”.

Bojoviç sonda rəqibin təzyiqinin qarşısını almaq üçün heç bir addım atmamasının səbəbini belə izah edib: “İstədiyimiz bütün əvəzetmələri etmişdik. Dəyişiklik limitimiz dolmuşdu”.

Mütəxəssis Mark Tamaşın oynamamasına belə aydınlıq gətirib: “Onun oynadığı matçda "Sumqayıt"a uduzmuşduq. Həmin görüşdən sonra dəyişiklik etdik. Lakin Sumqayıtdakı məğlubiyyətin səbəbkarı o deyildi”.

“Neftçi”nin çalışdırıcısı “Qarabağ”ın heyətində inamlı təsir bağışlayan həmyerlisi Marko Yankoviç gələcəkdə komandasında görmək istəməsi barədə sualı belə cavablandırıb: “Azərbaycanda hər məşqçi elə oyunçunu komandasında görmək istəyər”.

O, hazırkı heyətlə hədəfə çata biləcəklərini söyləyib: “Qarşımıza ikinci yeri tutmaq hədəfi qoyulub. Hər şey istədiyimiz kimi getsə, bu heyətlə hədəfə çata bilərik”.

Bojoviç sonda heç vaxt komandamın oyunundan razı qalmadığını vurğulayıb: “Düşünürəm ki, daha yaxşısını göstərə bilərik”.

Fərəc ASLANOV, Tovuz