"Komandamızın toparlanacağına inanırıq"

"Çətin oyun alındı. İki fərqli hissə izlədik. Birinci yarı daha çox rəqibin üstünlüyü ilə keçdi. İkinci hissədə oyunda dönüş yaratmağa çalışdıq, amma sonda bərabərlik qolunu vura bilmədik".

Futbolxeber.az saytının məlumatına görə, bu sözləri "Qəbələ"nin baş məşqçisi Elmar Baxşıyev Azərbaycan Premyer Liqasının 22-ci turunda "Turan Tovuz"la oyundan sonra keçirilən mətbuat konfransında deyib.

O, səfərdə 1:2 hesabı ilə uduzduqları matçı belə şərh edib: "Sonuncu pillədəyik. Bilirik ki, son sıranı tərk etmək üçün nəyi isə düzəltməliyik. Üç gündən bir oynamağımız təsirsiz ötüşmədi. Amma tək biz deyilik. Hər iki turnirdə oynamaq istəyirsənsə, bu problemlə üzləşəcəksən. Lakin zədəli və cəzalı futbolçular olduğu üçün rotasiyalar edə bilmədik. Komandamızın toparlanacağına və qarşıdakı görüşlərdə daha uğurlu olacağına inanırıq".

E.Baxşıyev komandasının hücum xəttindəki problemlerlə bağlı sualı da cavablandırıb: "Tək hücumda yox, müdafiədə də problemlərimiz var. Cəzalı və zədəli oyunçularımız heyətə dönəndən sonra tam fərqli olacağıq. Bütün futbolçular olanda, rəqabət də artır. Futbolçular bu gün əllərindən gələni etməyə çalışırdılar”.