Samir Abasov: “Uşaqlar əllərindən gələni, hətta daha da artığını etdilər”

“Plana uyğun olaraq bu gün Antalyada son yoxlama oyunumuzu keçirdik. Hava şəraitinə görə oyunun təxirə salınacağından narahat idik, amma şükürlər olsun ki, oyun baş tutdu və proqramımızdan kənara çıxmadıq”.

Futbolxeber.az saytının məlumatına görə, bu sözləri “Sumqayıt”ın baş məşqçisi Samir Abasov klubun mətbuat xidmətinə açıqlamasında deyib.

Abasovun komandası bu gün Antalyadakı təlim-məşq toplanışı çərçivəsində Özbəkistan təmsilçisi “Soqdiana”nın 3:1 hesabı ilə məğlub edib. Mütəxəssis komandasının qələbəsini belə şərh edib: “Bu gün bəzi oyunçuları onlara yad olan mövqelərdə yoxladıq. Bu da yoldaşlıq görüşlərinin özəlliklərindən biridir. Uşaqlar da oyuna tam köklənmişdilər. Düzdür, bir sıra səhvlərimiz də oldu. Lakin, toplanış boyu fiziki yüklənmələrin olduğunu, oyunun gedişatı zamanı verilən tapşırıqları nəzərə alsaq, hər şey normaldır”.

O, yekunlaşan Antalya toplanışını belə dəyərləndirib: “Ümumi toplanış barədə onu deyə bilərəm ki, hər şey ürəyimizcə oldu. Komandamdan razı qaldım. Uşaqlar məşqlərdə əllərindən gələni, hətta daha da artığını etdilər. Artıq sabah Vətənə yola düşürük. Növbəti turda "Qəbələ" ilə qarşılaşacağıq ki, bu oyuna da hazırlaşmağa bir xeyli vaxtımız var".