Diniyev Antalya toplanışını dəyərləndirdi: “Oyunumuzda irəliləyiş var”

“Səbail”in baş məşqçisi Şahin Diniyevin Futbolxeber.az saytına müsahibəsi

- Komandanız Antalyada hazırlığını başa vurdu, artıq sabah vətənə qayıdacaqsız. Ümumi olaraq təlim-məşq toplanışını necə dəyərləndirirsiz?

- Təlim-məşq toplanışı çox yaxşı keçdi. Futbolçuların işə yanaşması olduqca mühümdür. Əsas məsələ funksional hazırlığın yüksəlməsi idi. Bu tapşırığı futbolçularım canla-başla yerinə yetirdilər.

- Çempionatın startına 5 gün qalmış “Səbail” mövsümün ikinci yarısına nə dərəcə hazırdır?

- Hər iki yoxlama oyununda komandadan istədiyim aldım. Premyer Liqaya qədər hazır olacağıq, ya yox, bu suala cavab vermək bir qədər çətindir. Bununla belə, düşünürəm ki, birinci və ikinci dövrədə olduğundan daha yaxşı "Səbail" görəcəksiniz.

- Antalyadakı yoxlama matçları komandanızda hansı çatışmazlıqları üzə çıxardı?

- Təlim-məşq toplanışından maksimum yararlana bildik. Bu, hazırlıq oyunlarında da özünü göstərirdi. Komanda tempi 90 dəqiqə saxlaya bilirdi. Futbolçular fiziki səviyyəsi yaxşı olan rəqiblərə qarşı oyunlarda onlardan geri qalmadıqlarını göstərdilər.

- Hər nə qədər yoxlama matçı olsa da, Antalyanı qol vurmadan tərk edirsiz...

- Həmin matçlarda tam heyətlə oynamırdıq. Ona görə qol vura bilmədik. Yoxlama oyunlarında qol vəziyyəti yaratmaqdan daha çox funksional, taktiki hazırlığa yönəlmişdik. Oyunumuzda irəliləyiş var. Çoxlu qol fürsətləri əldə etsək də, istifadə edə bilmədik.

- Hər iki matçda Səlahət Ağayev heyətdə yox idi. O da zədələnib? Ümumiyyətlə, dünənki matçın protokolunda komandanızın heyətində cəmi 16 nəfərin adı qeyd olunmuşdu. Bu heyətlə “Səbail” nəyə ümid edə bilər?

- Bir çox oyunçularımız heyətdən kənarda qalıblar. 19 oyunçu ilə təlim-məşq toplanışına qatıldıq, ancaq onlardan üçü - Səlahət Ağayev, Yadin Lukasi və Valdemar Almeyda zədəli olduqları üçün onları yoxlama oyununda meydana buraxmağa risk etmədim. Zədəlilərimiz birisi gündən komandaya qoşulacaq. Bu, elə də qorxulu bir şey deyil.

- Transfer çalışmaları ilə bağlı nə yenilik var?

- İndiki zamanda legionerə ehtiyac var. Qış transfer bazarında isə legionerin tapılması və komandaya cəlb olunması bir qədər çətin məsələdir. Legionerin komandaya qoşulması, onun sənədləşdirilməsi işləri bir qədər vaxt alır. Bizim isə vaxtımız azdır. Amma bu həftə ərzində 2 legionerin komandaya qoşulması gözlənilir. Artıq onlar Bakıya yola düşmək üzrədirlər.

Azad NURİYEV