Sərxan Hacıyevin Tallindən verdiyi mesaj

Milli komandamız bu gün Avro-2024-ün seçmə mərhələsində növbəti oyununa çıxacaq. Estoniya ilə matçın nəticəsini təxminən 7 saat sonra biləcəyik. İndi həmin görüşə yox, başqa bir məqama – AFFA-nın baş katibi Sərxan Hacıyevin müsahibəsinə diqqətinizi çəkmək istərdik. Bu cızma-qaranı da həmin müsahibəyə bir baxış kimi dəyərləndirə bilərsiz.

Bu məqamda bir haşiyə çıxmaq istərdik. Əvvəla onu qeyd edək ki, uzun fasilədən sonra Estoniya səfərində milli komandamızı jurnalistlər də müşayiət edir. Yazının bu və qarşıdakı hissəsində “deyilənə görə” ifadəsindən istifadə etməyimizə səbəb dəvətlilər sırasında “Futbolxeber”in olmamasıdır. Yox, elə bilməyin ki, sözümüzün mustafası “səfər davasıdır”. Hər halda bilənlər bilir ki, mövcud olduğu 10 ildən artıq müddətdə heç kimə “Futbolxeber” səfər davası edir” demək şansı yaratmamışıq!

Yenə eşitdiyimizə görə, media orqanları səfərə dəvət edilərkən AFFA tərəfindən “mütləq mətbuat orqanının rəhbər şəxsi getməlidir” şərti irəli sürülüb. Özlüyündə bu məqam müəyyən şübhələr yaradır(dı).

Gələk Sərxan Hacıyevin müsahibəsinə. İlk diqqətçəkən məqam odur ki, AFFA-nın baş katibi qarşıdakı matçı az qala millimiz üçün ölüm-dirim səviyyəsinə qaldırır: “Bərabərlik və ya məğlubiyyətə haqqımız yoxdur”. Guya ki, millimiz bu gün Estoniyanı məğlub edib qrupu dördüncü yerdə tamamlasa, Azərbaycan futbolunda heç bir problem qalmayacaq. Sanki futbolumuzun yeganə dərdi qrupda beşinci yox, dördüncü olmaqdır. Halbuki qrupda beşinci, yaxud dördüncü olmağın heç bir fərqi yoxdur. Maksimum FİFA reytinqində 3-5 pillə irəliləyəcəyik, vəssəlam.

Sərxan Hacıyevin digər açıqlamaları – konkretləşdirsək, Rövnəq Abdullayev və Elxan Məmmədovla bağlı dedikləri isə “AFFA-da yalnız mən işləyirəm” təəssüratı yaratmaq təsiri bağışlayır. Rövnəq Abdullayev uzun müddətdir millinin səfər oyunlarına yollanmır. Axı bu, yenilik deyil. Bütün matçlarda iştirak edib, yalnız bu görüşə gəlməsəydi, bəli, məhz onda AFFA prezidentinin Estoniyaya yollanmaması xəbər olardı. O ki qaldı Elxan Məmmədovla bağlı açıqlamalara, kuluarlarda gəzən söhbətlərə görə, Sərxan Hacıyevin sələfi ilə münasibətləri çoxdan korlanıb. Hətta deyilənlərə inansaq, Hacıyev özünə yaxın çevrələrdə AFFA-ya yeni mətbuat katibi seçərkən əsas “şərt” olaraq “elə adam olmalıdır ki, Elxan Məmmədovla heç vaxt ünsiyyəti olmasın”ı irəli sürüb. Görünür, baş katibin bütün bu addımları martda AFFA rəhbərliyində ola biləcək mümkün dəyişikliklərə hesablanıb. Hazırkı rəhbərliklə əks mövqedə durduğunu nümayiş etdirməyə çalışan Sərxan Hacıyev indidən özünə yeni rəhbərlikdə yer etməyə cəhd edir. Hətta buna görə onu bu vəzifəyə təyin edən şəxs(lər)ə belə üz döndərir...

İbrahim CƏFƏROV