Vladislav Kulaç: “Qəbələ”yə məğlubiyyət göstərdi ki...” (MÜSAHİBƏ)

“Zirə”nin hücumçusu Vladislav Kulaç Futbolxeber.az saytına müsahibə verib.

- Ardıcıl 4 qələbədən sonra komandanız V turda “Qəbələ”yə uduzdu. Yenilgini nə ilə əlaqələndirmək olar?

- Çətin oyun alındı. Təəssüf ki, uduzduq. Yenilgimizdə xüsusi bir səbəb yoxdu.

- Bəlkə ardıcıl qələbələrdən sonra komandada arxayınlıq yaranmışdı?

- Xeyr. Sadəcə çox pis oynadıq. Xüsusən də birinci yarıda. Bu, bəlkə də cari mövsümdə ən zəif çıxış etdiyimiz hissə idi. “Qəbələ”yə məğlubiyyət bizə dərs olmalıdı. Həmin matçdakı səhvləri bir daha təkrarlamamalıyıq.

- Əvvəlki görüşlərdə “Zirə” hesabı açan tərəf idi. Mövsümdə ilk dəfə hesabda geri düşdüz və matçın gedişatını dəyişə bilmədiz...

- Həm ilk dəfə hesabda geri düşdük, həm ilk dəfə uduzduq. Məğlubiyyət futbolun ayrılmaz hissəsidi. Təbii ki, hər zaman qalib gəlmək istəyirsən. Amma unutmayaq ki, hər oyun çətin keçir. Ümid edirəm ki, bu, bir daha təkrarlanmayacaq.

- Oyun ərzində hər iki tərəf çox gərgin görünürdü, meydanda tez-tez mübahisə düşürdü. Bu, nədən irəli gəlirdi?

- Rəqib çox vaxt aparırdı. Buna görə onları qınaya bilmərəm. Amma hakimin matçın sonuna əlavə etdiyi 10 dəqiqə az idi. Lakin bütün bunlar uduzmağımıza səbəb, yaxud bəhanə deyil.

- Epizodların birində yerdə qaldız. Hakim VAR-da epizoda baxsa da, penalty təyin etmədi...

- Hakim düşündü ki, o epizodda yox idi. Amma mən fərqli düşünürəm. Fikrimcə, referi o epizodda 11 metrlik cərimə zərbəsi təyin etməli idi.

- Hazırda istirahətdəsiz. Bu, fasilə “Zirə”yə mənfi təsir göstərməyəcək?

- Xeyr. “Qəbələ” ilə oyun göstərdi ki, fasilə xeyrimizə olacaq. Məşqçilər son matçdakı səhvlərimizi göstərəcək. Biz də bundan nəticə çıxarmalıyıq.

- “Zirə”nin cari mövsümdəki hədəfi nədir?

- Hədəfimiz avrokuboklardı. Biz hər oyunda var gücümüzü meydanda qoymalıyıq. Ən yüksək yerlər uğrunda mübarizə aparırıq. Ona görə də əlimizdən gələnin ən yaxşısını etməliyik.