Tahir Gözəl: “Çempionlar Liqasının qrup mərhələsinə yüksələcəyik”

“Səfərdə oyunumuz ağır alınmışdı. Həva şəraiti, meydanın durumu və s. çətinliklər var idi. Son dəqiqədə vurduğumuz qol olmasaydı, həmin gün stadionu çox məyus tərk edəcəkdim. Amma bu gün öz meydanımızda, çox gözəl havada baxımlı futbol nümayiş etdirdik. Bəhlul Mustafazadənin qolu Avropa futbolu keyfiyyətində bir qol idi. Belə qolu yerli futbolçunu vurması mənə ləzzət edir”.

Futbolxeber.az saytının məlumatına görə, bu sözləri “Qarabağ”ın prezidenti Tahir Gözəl Çempionlar Liqasının I təsnifat mərhələsinin cavab oyununda “Linkoln”u 4:0 hesabı ilə məğlub etdikləri oyundan sonra deyib.

O, növbəti mərhələdə qarşılacaqları “Rakuv” barədə də fikirlərini açıqlayıb: “Bu vaxta kimi Polşa klubları ilə 3 dəfə qarşılaşmışıq. Allaha şükür ki, üçündə də qalib gəlmişik. Artıq Avropada hansısa kluba zəif demək olmaz. “Rakuv” güclü rəqibdi. Bəli, Polşa mətbuatı “Qarabağ” kabusu qayıdır” yazır. Amma rəqib atletik cəhətdən güclüdü. İnşallah, Polşaya da bu keyfiyyətlə, bu əzmlə gedib, oradan qələbə ilə dönməyə çalışacağıq”.

T.Gözəl “Qarabağ”ın ötən il yoxlama oyununda “Rakuv”a uduzmasını da xatırlayıb: “Hər oyun yenidi. Biz səfərə qələbə üçün gedəcəyik. Məncə, bu söz kifayət edər”.

Klub rəhbəri yeni transferlər haqda sualı da cavablandırıb: “Bu gün qısa müddətdə transfer fikri yoxdu. Onsuz da transfer çox ağır bir prosesdi. Əgər itkimiz olsa, hazırda Medinanın gedişi gündəmdi. “Rizəspor”la danışıqlar gedir. Bu keçid baş tutarsa, onun yerinə transfer ola bilər. Ancaq hazırda bu məsələ qeyri-müəyyəndi”.

O, komandanın qarşısına qoyulan hədəfdən də söz açıb: “İnşallah, digər 3 turu da keçib Çempionlar Liqasının qrup mərhələsinə yüksələcəyik”.

Fərəc ASLANOV