Ayxan Abbasov 5 qollu qələbəni şərh etdi

“Bizim üçün əsas olan oyun tempi idi. Heyətimizdə yeni futbolçular var. Onlar hazırda adaptasiya dövrünü keçirlər”.

Futbolxeber.az saytına müsahibəsində bu sözləri “Turan Tovuz”un baş məşqçisi Ayxan Abbasov yoxlama oyununda “Araz Naxçıvan”ı 5:1 hesabı ilə məğlub etdikləri oyundan sonra deyib.

Mütəxəssis yoldaşlıq görüşündə komandadan istədiklərini ala bildiklərini vurğulayıb: “Ümumi götürdükdə, oyundan razı qaldıq. Əsas odur ki, bu gün komandadan istədiklərimizi ala bildik. Bu matçla hazırlığın ilk mərhələsinə yekun vurduq. Növbəti mərhələ Türkiyədə olacaq”.  

O, komandasının rəqib qapısından  5 top keçirməsinə belə münasibət bildirib: “Həmişə deyirik ki, yoxlama oyunlarında nəticə önəmli deyil. Amma bu gün futbolçuların qol vurması, özlərinə inamı bizim üçün vacibdi. Qol olanda biz də sevinirik, futbolçular da”.

Fərəc ASLANOV