“Sabah”ın hədəfində olan futbolçu intizamsızlığı ilə diqqət çəkir: Hazırda 8 oyunluq cəzalıdı

“Sabah”ın transfer etmək istədiyi “Krasnodar”ın hücumçusu Maqomed-Şapi Süleymanovla bağlı maraqlı məqamlar ortaya çıxıb.

Futbolxeber.az saytının məlumatına görə, rusiyalı futbolçu intizamsızlığı ilə diqqət çəkir. Belə ki, Süleymanov son 5 ayda iki dəfə qalmaqal iştirakçısı olub.

“Sport Ekspress” saytında Süleymanovla bağlı yer alan yazıda bildirilir ki, hücumçu hazırda cəzalıdı. Belə ki, son mövsümü icarə əsasında çıxış etdiyi “Hapoel Bear Şeva”nın Hayfa “Makkabi”sinə qarşı keçirdiyi oyunda (1:2) kütləvi davada iştirak etdiyinə görə o, 10 oyunluq cəzalanıb.

Məsələ ondadır ki, “Hapoel Bear Şeva” - “Makkabi” matçı başa çatdıqdan sonra 2 klubun futbolçuları arasında dava düşüb. İkinci hissənin əvvəlində əvəzlənən Şapi insidentdə fəal iştirak edib. O, rəqib futbolçu Dolev Xazizə şillə vurub. Süleymanov daha sonra etdiyi hərəkətə görə üzr istəsə də, bu, onun cəzadan qaçmasına kömək etməyib. Yekunda rusiyalı futbolçu 10 oyunluq cəzalanıb. Həmin cəzanın yalnız 2 matçı geridə qalıb. 8 oyunluq cəzası qalan Süleymanov məhz bu səbəbdən “Hapoel Bear Şeva”dən ayrılmaq istəyir. “Sport Ekspress” bildirir ki, Süleymanov karyerasını Türkiyə və ya Rusiyada davam etdirmək istəyir. Vətənində “Rubin” futbolçuya maraq göstərir.

Süleymanov daha əvvəl də İsrail Futbol Assosiasiyası tərəfindən 4 oyunluq cəzalanmışdı. Belə ki, Şapi Netanya “Makkabi”sinə qarşı keçirilən kubok matçında rəqib futbolçu Eden Karsevin üzünə dirsəyi ilə qəsdən zərbə endirib.

VAR-a baxdıqdan sonra hakim rusiyalı futbolçunu meydandan qovub. İsrail Futbol Assosiasiyası isə Şapini 4 oyunluq cəzalandırıb.

Əlavə edək ki, “Sabah” Süleymanova Aleksey Kaşukun əvəzləyicisi gözü ilə baxır. Bakı klubu qış transfer pəncərəsi zamanı transfer etmək şərti ilə “Krasnodar”ın hücumçusunu icarəyə götürmək istəyir. “Sabah” Maqomed-Şapi Süleymanova “Hapoel”də qazandığı qədər – ildə 250-300 min dollar ödəməyə hazırdı. 

Futbolxeber.az-ın teleqram kanalına abunə olun