“Turan Tovuz” hələ Premyer Liqada yerini təmin etməyib”

“Turan Tovuz”un baş məşqçisi Ayxan Abbasov Azərbaycan Premyer Liqasının XXVIII turunda “Sumqayıt”dan alınan 2:3 hesabı məğlubiyyətin arxayınçılıqla əlaqəli olmadığını vurğulayıb.

Futbolxeber.az saytının məlumatına görə, mütəxəssis oyunsonrası mətbuat konfransında qeyd edib ki, komandası hazırda turnir cədvəlində 6-cı pillədə qərarlaşsa da, hələlik növbəti mövsüm üçün Premyer Liqaqa yerini təmin etməyib:

“Arxayınçılıqdan söhbət gedə bilməz. Çünki Premyer Liqada yerimizi hələ təmin etməmişik. Baxmayaraq ki, hazırda altıncı pillədəyik. Riyazi hesablamalara görə, hər şey mümkündür. 9 tur 27 xal edir. Premyer Liqada yerimizi təmin etsək belə, oyunlara qeyri-ciddi yanaşmalıyıq deyə bir şey yoxdu. Çünki hər oyun üçün mükafat ayrılır və futbolçular da həmin mükafatı qazanmaq üçün çalışırlar. Bizim ən böyük çətinliyimiz stabilliyin olmamasıdır”.