Tural Piriyev: “Huner Group”un sponsorluğu bölgəyə bağlılıq və fədakarlıqdır”

“Bu sponsorluq müqaviləsi böyük komanda işidir. İlk növbədə Tovuz Rayon İcra Hakimiyyətinin rəhbərliyinə təşəkkür edirəm. Futbol əyləncə növüdür. Futbolun bölgə üçün sosial və iqtisadi önəmi var. Çox sevindirici haldır ki, həm “Turan Tovuz”, həm də icra rəhbərliyi bizə hər məsələdə kömək olub”.

Futbolxeber.az saytının məlumatına görə, bu sözləri “Turan Tovuz”la “Huner Group” arasında sponsorluq müqaviləsi imzalanması ilə bağlı tədbirdə Futbolun İnkişaf Fondunun icraçı direktoru Tural Piriyev deyib.

O, “Huner Group”la imzalanan sponsorluq müqaviləsində fədakarlıq amilini qeyd edib:

“Futbol İnkişaf Fondunun Himayəçilər Şurasının üzvü, millət vəkili Qənirə Paşayevaya təşəkkür edirəm. Onun da bu danışıqlarda böyük rolu olub. Təəssüf ki, bu gün burda iştirak edə bilmir. “Huner Group” şirkətinin rəhbəri Ehtiram müəllimə təşəkkür edirəm. Yaydan danışıqlara başladıq. Çalışdıq ki, uzunömürlü əməkdaşlıq quraq. Burda biznes marağını qeyd etmək olmaz. Bu, bölgəsinə bağlılıq və fədakarlıqdır. Ümid edirəm ki, “Huner Group”un bu fədakarlığı digər biznes adamları üçün simul olacaq. “Turan Tovuz”da şəffaf iş qurulub. Bu da bizə klubun adından sahibkarlarla açıq şəkildə danışmağa imkan verir”.

İbrahim CƏFƏROV