Rəşad Sadıqov: "Nə vurdularsa, qol oldu"

“120 dəqiqə maraqlı futbolun şahidi olduq. Birinci hissədə baxımlı olmasa da, aqressiv oyun gedirdi. Ikinci hissədə oyun çox dəyişdi”.

Futbolxeber.az saytının məlumatına görə, bu sözləri "Zirə"nin baş məşqçisi Rəşad Sadıqov Azərbaycan kubokunun 1/4 finalının "Neftçi" ilə cavab oyunundan sonra mətbuat konfransında deyib.

İlk oyunda 1:0 hesablı qələbə qazanan "Zirə" bu gün rəqibinə 1:3 hesabı ilə uduzaraq mübarizəni dayandırıb. 

R.Sadıqov bildirib ki, hər iki komanda mərhələni keçməyə layiq idi: "Baxımlı və sürətli futbol izləyirdik. "Neftçi"ni təbrik edirəm. Dünən "Qarabağ" və "Sabah"ın mübarizəni dayandırması "Neftçi" üçün əlavə motivasiya olacaqdı. Biz də çox istəkli idik. Rəqib əlinə düşən fürsətlərdən maksimum istifadə etdi. Qaçırdıqları epizod xatırlamıram. Nə vurdularsa, qol oldu. Bizim isə yaxşı qol vəziyyətlərimiz oldu. Son zərbə çatmadı. Rəqibin heyətində yetərincə usta futbolçular var. Bu faktor oyunun taleyində əsas rol oynadı". 

Baş məşqçi penalti epizodunda futbolçuları Rəhim Sadıxovla Hamidu Keytanın mübahisə etməsinə də münasibət bildirib: "Rəhimi penaltiyə görə əvəzlədim. Bizdə iki penaltiçi var. Keyta və Rəhim. Birinci Keytadır. O, özünü inamlı hiss etmədikdə Rəhim vura bilər. Keyta topu götürüb vururdu. Aralarında bölüşə bilmədilər. Bu hal heç xoşuma gəlmədi. Pozitiv notlarda idim. Yaxşı mübarizə gedirdi, fərqlənə bilərdik. Amma o epizod məni məyus etdi. Rəhimin cəzalandırılıb-cəzalandırılmayacağı haqa düşənəcəyəm. İsti-isti fikir bildirib tələskən qərar vermək istəmirəm". 

R.Sadıqov Keytanın artıq ikinci dəfədir penaltini qaçırması haqda deyib: "Bundan sonra da qaçıra bilər. Bizim penaltiçimiz Keytadır. Bir çox futbolçular qaçırır. Bu həssas məqamdır. Tez-tez dəyişmək olmaz. Mənə xoşdur ki, futbolçu səhv etdikdən sonra yenə özünə güvənir. Keyta penaltini öz əməyi ilə qazandı. Futboldur, belə şeylər olur".