"Rapid"in baş məşqçisi: "Əminəm ki, "Neftçi" ilə oyunda da hər şey yaxşı olacaq"

"Neftçi"nin Konfrans Liqasının 3-cü təsnifat mərhələsindəki rəqibi "Rapid"in baş məşqçisi Ferdinand Feldhofer yerli çempionatda "Austria"ya (Lustenyau) qarşı keçirdikləri matçı şərh edib.

Futbolxeber.az saytının məlumatına görə, o, 1:1 hesabıyla başa çatan matça bağlı danışarkən qısaca olaraq "Neftçi" ilə qarşıdan gələn görüş haqda da fikir bildirib:

"Neftçi" ilə çətin oyundan və uzun səfərdən sonra layiqli performan sərgilədik. Bakı səfəri bəhanə deyil, amma ümumilikdə bu matçda pis çıxış etmədik. Gərgin həftə keçirdik. Bundan sonra əminəm ki, Konfrans Liqasında "Neftçi" ilə oyunda da hər şey yaxşı olacaq".

Qeyd edək ki, "Neftçi" Bakıdakı ilk matçda Avstriya klubunu 2:1 hesabıyla məğlub edib. Komandalar arasındakı cavab matçı avqustun 11-də Vyanada olacaq.