Valbuena "Neftçi" ilə oyundan danışdı

“İlk oyunda olduğu kimi, bu dəfə də çətinliklərə hazırıq. Asan oyun olmayacaq. Amma yenə qələbə qazanmağa çalışacağıq”.

Futbolxeber.az saytının məlumatına görə, bu sözləri “Olimpiakos”un futbolçusu Matye Valbuena Çempionlar Liqasının 2-ci təsnifat mərhələsində “Neftçi” ilə keçiriləcək cavab görüşü öncəsi təşkil edilən mətbuat konfransında deyib.

37 yaşlı yarımmüdafiəçi əvvəlcə Yunanıstandakı oyunda zəif çıxış etmələrinin səbəbini açıqlayıb: "Bəzi oyunçularımız iştirak etmədiyi üçün Yunanıstanda çətinliklərlə üzləşdik. Bunu da gözləyirdik. Ancaq yenə də addım-addım irəliləmək və Çempionlar Liqasında məqsədimizə çatmaq istəyirik. Əlimizdən gələni edəcəyik. Bütün komanda şəklində oyuna yaxşı hazırlaşmışıq və qələbə qazanmağa köklənəcəyik”.

Fransa millisinin sabiq üzvü  sürpriz nəticəyə imkan verməyəcəklərini bildirib: "Bəzi problemlərimiz oldu. Amma bunu bir saniyə də ağlımızdan keçirmirik. Oyun çətin olacaq. Ancaq biz öz proqramımız üzrə hərəkət edirik".

Qeyd edək ki, sabah “Bakcell Arena”da keçiriləcək “Neftçi” - “Olimpiakos” oyunu saat 21:00-da başlayacaq. "Olimpiakos" Yunanıstandakı ilk qarşılaşmada 1:0 hesablı qələbə qazanıb.