Sənan Qurbanov "Keşlə"də qaldı, 3 legioner göndərildi

"Keşlə" baş məşqçisi Sənan Qurbanovla yeni müqavilə imzalayacaq.

Futbolxeber.az saytının məlumatına görə, bu barədə 41 yaşlı mütəxəssisin özü açıqlama verib.

O, klubun Müşahidə Şurasının sədri Zaur Axundovla görüşdüyünü və əməkdaşlığı davam etdirməklə bağlı razılığa gəldiklərini bildirib. Qurbanovun sözlərinə görə, yaxın günlərdə 1 illik yeni sözləşməyə imza atacaq.

Qeyd edək ki, Sənan Qurbanov bu ilin yanvarından "Keşlə"yə başçılıq edir. Komanda onun rəhbərliyi altında Azərbaycan Kubokunun qalibi olub.

Əvəzində isə "Keşlə" 3 oyunçusu ilə yollarını ayırıb. Belə ki, Con Kamara, Sadio Tounkara və Silvio Rodriges komandadan göndərilib. Sözügedən oyunçularla başa çatan müqavilənin müddəti yenilənməyib.

Kamara 2019-cu ilin yanvarından "Keşlə"də çıxış edirdi. Rodriges ötən ilin yayında, Tounkara isə başa çatan mövsümün ikinci yarısında Bakı klubuna keçmişdi ("Report").