İnamın, cəsarətin, Məsiyevin və ... Namiqin qələbəsi

1 penalti, 3 qol, 4 qırmızı vərəqə - yəqin ki, ən optimist azarkeş belə “Qarabağ” - “Neftçi” oyununda bu qədər gərginliyin yaşanacağını gözləmirdi. Şənbə günü tarixən “Neftçi”nin, indi isə “Qarabağ”ın “ev”inə çevrilmiş Tofiq Bəhramov adına Respublika stadionunda futbol adına hər şey var idi. Yeganə çatışmazlıq azarkeşlərin yoxluğu idi. Lənətə gəlmiş koronavirus olmasaydı, hər iki klubun fanatları ümumilikdə 100 dəqiqəyə yaxın davam edən mübarizəyə daha da rəng qatacaqdılar. Xüsusən də, bu günlərdə 12 yaşını qeyd edən “Forza Neftçi”nin çılğınlığını görməyə dəyərdi.

Təbii ki, nəticədən sonra ən çox önə çıxan məqam oyundakı qırmızı vərəqələrdi. Bu günlərdə FİFA referisi adını almış Elçin Məsiyev “Qarabağ”ın 1, “Neftçi”nin 3 futbolçusunu meydandan qovdu. Respublika stadionunun Media sektorundan meydanda baş verənləri tam dəqiqliklə görmək mümkün olmur. Lakin epizodlarını təkrarını izlədikdən sonra açıq-aşkar məlum oldu ki, Məsiyevin qırmızı vərəqələrlə bağlı qərarları 100-də 100 haqlı idi. Onun yeganə çatışmazlığı kimi bəzi epizodlarda loru dildə desək, səsə fit verməsi idi. Bu baxımdan xüsusən “Qarabağ”ın hücumçusu Kvabena Ovusu “fəal” idi. O ki qaldı “Qarabağ”ın qoluna, burda nə günah varsa, yan xətt hakiminin boynundadı. İstənilən halda, Məsiyev inamı, qətiyyəti və cəsarəti ilə Azərbaycan derbisinə damğasını vurdu. Oyundan sonra “Qarabağ”ın baş məşqçisi Qurban Qurbanov da gənc hakimin idarəçiliyini xüsusi qeyd etdi: “Hakim də inamlı qərarlar verdi”.

Elçin Məsiyev 4 futbolçunu meydandan qovarkən zərrə qədər də tərəddüd etmədi. Gənc referinin cəsarətini alqışlamaq lazımdı. Hər halda, sonuncu dəfə nə vaxt “Qarabağ”ın qapısına penalti təyin olunub, futbolçusunun meydandan qovulmasını, yaxud “Neftçi”ni oyunu 8 nəfərlə başa vurmasını xatırlamaq asan deyil. Bəlkə də Məsiyevin yerində hansısa təcrübəli həmkarı olsaydı, bu qədər cəsarətli olmazdı. “Qarabağ” - “Neftçi” oyunundakı idarəçiliyi ilə Məsiyev FİFA referisi adına layiq olduğunu göstərdi. Bu, bəlkə də gələcəkdə Əliyar Ağayevdən də irəli gedəcək azərbaycanlı hakimin parlaq karyerasını ilk işartıları idi. Gələcəyin necə olacağını dəqiq deyə bilmərik. Amma görünən odur ki, artıq AFFA Hakimlər Komitəsinin, komitə sədri Fritz Stuchlikin işi nəticə verməkdədi.  

Futbol komanda oyunudu və qələbəni bir nəfərin adına yazmaq bəlkə də düzgün deyil. Amma “Neftçi”nin həm “Qarabağ” üzərindəki qələbəsində, həm hazırkı liderliyində Namiq Ələsgərov xüsusi pay sahibidi. Hesabın açıldığı epizodda əvvəlcə topu rəqibdən alan Ələsgərov daha sonra rəqibin iki müdafiəçisindən ustalıqla sıyrılaraq topu qapıçının başı üzərindən qapıya göndərdi. Penalti zamanı isə meydanda daha təcrübəli komanda yoldaşlarının olmasına baxmayaraq, Ələsgərov məsuliyyəti üzərinə götürdü və Şahruddinə növbəti dəfə şans vermədi. Yetirməsi olduğu “Bakı”nın aşağı yaş qruplarında daim hücumçu kimi çıxış edən və müxtəlif yaş qrupu üzrə liqaların bombardiri olmuş Namiq Ələsgərov yenidən hücumçu mövqeyində çıxış edir və qolları sıralayır. Görünən odur ki, digər məşqçilərdən fərqli olaraq Samir Abasov Namiqdən hansı mövqedə faydalanmalı olduğunu bilir.

“Neftçi” cari mövsüm ikinci dəfə “Qarabağ”ı səfərdə məğlub etdi və bununla da “Şəmkir”in 19 illik rekordunu yenilədi. Bu qələbə həm də onu göstərdi ki, son illər “Qarabağ”ın ardıcıl çempionluqlar qazanmasında komandanın güclü olması ilə yanaşı, çempionatdakı rəqabətsizliyin də rolu böyükdür. Əgər çempionatda “Neftçi” kimi daha 2-3 klub olsa, çətin ki, “Qarabağ” ardıcıl çempion olsun. Necə ki, 2004-cü ildən 6-7 il ərzində - “Bakı”, “Xəzər Lənkəran”, “İnter”, “Karvan”ın dövründə “Qarabağ” nəinki çempion olur, bəzən heç avrokuboklara da vəsiqə qazana bilmirdi...

FUTBOLXEBER.AZ