“Sabah”ın baş məşqçisi: “Çox pis oynadıq”

“Sabah”ın baş məşqçisi Visente Qomes Azərbaycan Premyer Liqasının 4-cü turunda “Səbail”ə qarşı keçirdikləri oyunu şərh edib.

Futbolxeber.az saytının məlumatına görə, ispan məşqçi 1:2 hesabı ilə uduzduqları matçdan sonra təşkil olunan mətbuat konfransında bunları söyləyib:

- Ümumi olaraq, çox pis oynadıq. Oyunumuzdan narazıyam. İlk qoldan sonra matçı həll edə bilərdik, amma olmadı. "Səbail" qoldan sonra bizdən üstün oynadı və qələbə qazandı.

- Adətən qalib heyəti dəyişmirlər. Komandanız son iki turda qol buraxmasa da, bu gün mərkəz müdafiəçisi Bəhlul Mustafazadə ehtiyatda idi. Bu, sizin qərarınız idi, yoxsa Bəhlulun zədəsi var?

- Həftə ərzində Bəhlulda bir az narahatlıq var idi və ona görə qərar verdim ki, ehtiyatda qalsın.

- Yəqin ki, “Sabah”ın baş məşqçisi olarkən komandanın əvvəlki oyunlarına baxmısız. Ötən mövsüm əsas heyət üzvü olan Şakir Seyidov bu gün komandadan kənarda qalıb. Bu haqda nə deyə bilərsiz?

- Mən bura gələndən Şakir komandada deyil. Bunu klubdan soruşmaq lazımdır ki, o, nə üçün heyətdən kənarda qalıb. Mənim deyə biləcəyim nəsə yoxdur.

- İki penalti epizoduyla və hakimliklə bağlı fikirləriniz necədir? Xüsusən də komandanızın lehinə təyin olunan penalty ciddi müzakirələrə yol açıb.

- Hakimlər barəsində danışmaq istəmirəm və bu üzrə mütəxəssis deyiləm. Onlara gələcəkdə uğurlar arzu edirəm.

- “Sabah” ikinci hissədə inamsız çıxış etdi. Sizə elə gəlmir ki, komandanız qələbəyə çox tez inandı?

- Açığı, istədiyimiz oyunu oynaya bilmədik. Bu matçı təhlil edərək, nəticələr çıxaracağıq.