“Linfild”in baş məşqçisi: “İlk görüşdə hesab 3:1 olsaydı belə...”

“Linfild”in baş məşqçisi Devid Hili  Avropa Liqasının pley-off mərhələsində “Qarabağ”la cavab oyunu öncəsi mətbuat konfransı keçirib. Futbolxeber.az saytının məlumatına görə, o, əvvəlcə matç haqda danışıb.

- Fikrimcə, ilk görüşdə hesab 3:1 olsaydı belə, rəqib favorit olacaqdı. Sabah ən yaxşı oyunumuzu göstərməyə çalışacağıq. Nələrin baş verəcəyini birlikdə görəcəyik.

- Bakı barədə təəssüratlarınız necədir?

- Bakı çox gözəl şəhərdir. Bu gün qaldığımız otelin yanında gəzmək imkanımız oldu. Bakı haqda ancaq müsbət təəssüratlar var.

- Bura gələn komandalar bir qayda olaraq müdafiə futbolu sərgiləyir. Siz də bu ənənəni davam etdirəcəksiniz?

- Rəqib çox güclü komandadır. Evdə müsbət statistikaları var, az uduzublar. Güclü rəqibə qarşı müdafiə olunmalı olacağıq. İnanıram ki, nəticədən və oyundan razı qalacağam.

- 1 milyon funt-sterlinqiniz olsaydı, neçə faizini “Linfild”in mərhələ adlamasına yatırardınız?

- UEFA qaydalarına əsasən, biz mərcə pul yatıra bilmərik. Sözsüz ki, “Qarabağ” favoritdi. Bu qədər pulum olsaydı, “Qarabağ”ın oyunçularından almaq istəyərdim. Məsələn, Riçard Almeyda, Xayme Romero və Rahil Məmmədovu istəyərdim.

- Mərhələ keçə bilməsəniz, təyyarədə gözünüzə yuxu gedəcək?

- Adətən səfərdən evə qayıdanda baş məşqçilər çox şeyi düşünürlər. Səyahətimiz uzun olacaq. Mərhələ keçə bilsək, bu səyahət daha yaxşı yadda qalacaq.