AFFA və “Neftçi”yə ayrılan maliyyəyə bundan sonra kim nəzarət edəcək?

AFFA və “Neftçi” ciddi dəyişikliklər astanasındadır. Ən azı maliyyə baxımından. Belə ki, bu gün mətbuatda SOCAR-ın birinci vitse-prezidenti Mikayıl İsmayılovun fəaliyyətində yeyintilərinin aşkarlanması və faktiki bütün səlahiyyətlərinin əlindən alınaraq Elşad Nəsirova verilməsi haqda məlumatlar dərc olunub.

Bilməyənlər üçün xatırladaq ki, SOCAR-ın birbaşa maliyyə dəstəyi ilə ayaqda duran AFFA və “Neftçi”yə ayrılan maddi vəsaitə məhz Mikayıl İsmayılov nəzarət edir. Lorı dildə desək, İsmayılovun icazəsi olmadan assosiasiyaya və ya “ağ-qaralar”a bir qəpik də ayrıla bilməz. Hətta “Neftçi”nin vitse-prezidenti postunu tutan, klubda maliyyə işlərinə nəzarət edən Elnur Eyvazov da məhz İsmayılovun kadrıdır.

Yazılanları rəsmən təsdiqini tapsa, istər AFFA-da, istərsə də “Neftçi”də dəyişiklik qaçılmaz olacaq. Maraqlıdır, görəsən AFFA və “Neftçi”yə ayrılan maliyyəyə bundan sonra kim nəzarət edəcək?

Bu arada onu da qeyd edək ki, bu günlərdə “Neftçi” ilə tərəfdaşlıq müqaviləsi imzalayan “Meqa Sığorta” da məhz Mikayıl İsmayılova məxsusdur.

Futbolxeber.az