Nicat Qurbanov: “Boş oturmamışıq”

“Kəpəz” çempionatın ikinci hissəsi üçün çalışmalarını Bakıda davam etdirir. 

 

Futbolxeber.az-ın məlumatına görə, Gəncə təmsilçisi əvvəlcədən tərtib olunmuş plan üzrə hazırlaşır. Klub saytına danışan “sarı-göylər”in yarımmüdafiəçisi Nicat Qurbanov hazırlıqla bağlı fikirlərini açıqlayıb:

 

“Hazırlığımız yaxşı gedir, səhərlər dəniz kənarında, axşam meydançada məşq edirik. Fasilə müddətində də boş oturmamışıq. Məşqçilər korpusunun tapşırığına əsasən, aktiv istirahət keçirmişik. Yəni peşəkarlığa uyğun olaraq fərdi şəkildə hazırlaşmışıq. Yüngül məşqlərlə də olsa, formamızı qorumağa çalışmışıq. Bu mənada təlim-məşq toplanışında deməzdim ki, axsamalar var. Düzdür, istirahətdən sonra müəyyən çətinlik olmalıdı. Çünki toplanışla fərdi məşqlər fərqlidir. Artıq hazırlığa uyğunlaşmışıq, hər şey plan üzrə davam edir. Məşqlər ağır keçir ki, bu da başa düşüləndir. Çempionata belə hazırlaşmaq lazımdır. Əziyyət çəkməsək, məqsədə çatmaq mümkün olmayacaq. Qarşıda yoxlama oyunları da var. Öz formamızı bərpa edib, mövsümün ikinci hissəsinə yaxşı başlamaq istəyirik”.