Samir Abasov: “Şərhçi “Neftçi” barədə deyir ki, “bu heyətlə heç nə etmək olmaz”...”

“Erkən qol vursaq da, sonradan qapımızda 3 top gördek. Rəqibin təzyiqinə tab gətirmədik. Bu oyun bəzi futbolçuların taleyinə aydınlıq gətirəcək”. Futbolxeber.az saytının məlumatına görə, bu sözləri “İnter”lə oyundan sonra “Sumqayıt”ın baş məşqçisi Samir Abbasov deyib.

Komandasının 1:3 hesablı məğlubiyyətini şərh edən gənc məşqçi heyətlə bağlı seçim imkanının geniş olmadığını qeyd edib: “Bəzi məşqçilər heyətdən şikayətlənir. Keçən dəfə “Neftçi”nin oyununa baxıram, şərhçi deyir ki, “bu heyətlə heç nə etmək olmaz”. Ancaq bir baxın, bizdə vəziyyət necədi... Bizdə heç legioner də yoxdu. Məcburuq bu oyunçularla oynamağa. Bir az çətindi. Bizi də başa düşün. Oyunçuları əvəzediciyə göndərsəm, heyətdə kim oynayacaq?”