"Neftçi" rəhbərliyinin gənc futbolçuların inkişafı üçün atdığı addım təqdirəlayiqdir"

“Neftçi” PFK-nın futbolçusu Nicat Qurbanov klubun rəsmi saytına açıqlama verib. Futbolxeber.az-ın məlumatına görə, son 1 ili icarə əsasında “Simurq” klubunda keçirən 21 yaşlı yarımmüdafiəçi ardıcıl 3 dəfə Azərbaycan çempionu olan flaqmana qayıtdığı üçün şad olduğunu bildirib: “Klub rəhbərliyinin gənc futbolçuların inkişafı üçün atdığı addım təqdirəlayiqdir. Xatırlayırsınızsa, Elvun Yunuszadə “Simurq”da bir il oynayandan sonra “Neftçi”yə qayıdıb, əsas heyət üzvünə çevrildi. Eyni addımı mən də atdım, Zaqatala klubunda Premyer Liqa təcrübəsi qazandım. “Neftçi”yə qayıtdığıma görə çox şadam. Doğma komandamızın uğurları üçün çalışacağam. “Neftçi” kimi tarixi klubun üzvü olmaq hər bir futbolçu üçün böyük şərəfdir”.

Qurbanov komandasının Çempionlar Liqasında mübarizə aparmasına da münasibət bildirib: “Neftçi” ötən il Avropa Liqasının qrup mərhələsinə vəsiqə qazandı. Bu il eyni uğura daha mötəbər turnir olan Çempionlar Liqasında nail olmağa çalışacağıq. Artıq mən də komandama var gücümlə kömək etmək üçün əlimgən gələni edəcəyəm. Məqsədim əsas heyətdə möhkəmlənməkdir”.