"İnter"in Avroliqadakı rəqibini yaxından tanıyaq

“İnter” Avroliqanın ilk təsnifat mərhələsində Moldovanın “Tiraspol” klubu ilə qarşılaşacaq. Futbolxeber.az-ın məlumatına görə, eyniadlı şəhəri təmsil edən komandanın əsası 1991-ci ildə qoyulub. İlk əvvəl komanda Kişinyovu təmsil edib və “Konstruktorul” adlanıb. 2001-ci ildə Çibruçiyə üz tutan kollektiv, 2002-ci ildən Tiraspolda məskunlaşıb.

Klubun əsası Valeri Qriqoryeviç Rotar qoyub. Komanda ilk uğuruna 1995/96 mövsümündə nail olub. Həmin vaxt ölkə kubokunun finalında “İnter”in rəqibi “Tiliqul”a qalib gəlib – 2:1. 1996/97 mövsümündə isə komanda ilk dəfə ölkə çempionu olub. Növbəti mövsümdə “Tiraspol” yenidən ölkə kubokuna sahib çıxıb.

Hazırda “Tiraspol”un prezidenti Viktor Tulbadır. Baş məşqçi vəzifəsini isə Vlad Qoyan yerinə yetirir. O, 2011-ci ildən bu vəzifəni icra edir. 2012-ci ildə Moldovanın ən yaxşı məşqçisi seçilən Qoyanın rəhbərliyi altında “Tiraspol”, 1 dəfə (2013) Moldova kuboku, 1 dəfə (2013/14) ölkə çempionatının gümüş, bir dəfə də (2012/13) bürünc medallarını qazanıb.

Komanda ev oyunlarını “Şerif” İdman Kompleksinin stadionunda keçirir.  Bu arenanın tutumu 13300-dür. UEFA-nın son açıqlanan reytinq cədvəlində “Tiraspol” 378-ci yeri tutur. Komanda ev oyunlarında qırmızı, səfər matçlarında isə yaşıl rəngli formadan istifadə edir.

Tarixi ərzində “Tiraspol” 1 dəfə (19970 Moldova çempionu olub, 2 dəfə (1999, 2014) ikinci, 5 dəfə də (1996, 1998, 2000, 2006, 2013) üçüncü yeri tutub. Bundan başqa, komanda 3 dəfə (1996, 2000, 2013) Moldova kubokunun qalibi, 2 dəfə (1998, 1999) finalçısı olub. Ötən il də “Tiraspol” ölkə Superkuboku uğrunda mübarizədə uduzub.