Vaqif Sadıqov AZAL-dan getdi

Son vaxtlar Premyer Liqada uğursuzluğa imza atan Bakının AZAL Peşəkar Futbol Klubunun baş məşqçisi Vaqif Sadıqov vəzifəsindən istefa verib.

AZAL PFK-nun mətbuat xidmətinin rəhbəri Eldəniz Yusifov Trend-ə bildirib ki, bu gün AZAL PFK-nun rəhbərliyi və baş məşqçi görüş keçirib. Görüşdə komandanın son vaxtlar düçar olduğu uğursuzluqlar və əldə olunan mənfi nəticələr müzakirə edilib.

Rəhbərlik komandanın mövsümün əvvəllərində qarşıya qoyulan hədəflərdən uzaq düşdüyünü vurğulayıb.

Müzakirələr zamanı klub rəhbərliyi ilə baş məşqçi arasında ümumi nəticə əldə olunmayıb.

Bu səbəbdən Vaqif Sadıqov baş məşqçi vəzifəsindən istefa verdiyini bəyan edib. Vaqif Sadıqov bu qərarını günün sonunda futbolçulara da rəsmən bəyan edib.