Ekvadorda stadiona silahlı hücum olub

Ekvadorda futbol matçı zamanı şok hadisə yaşanıb.

Futbolxeber.az saytının xarici KİV-ə istinadən verdiyi məlumata görə, dəhşətli insident Ekvadorun cənubunda, Peru ilə sərhəddə yerləşən Buenavista şəhərində baş verib.

Belə ki, stadiona gələn bir qrup silahlı şəxs azarkeşlərə atəş açıb. Nəticədə 3 nəfər ölüb, 12 yaşlı qız da daxil olmaqla 5 nəfər yaralanıb.

Polis polkovniki Pablo Fajardo bildirib ki, şübhəlilər hadisə yerinə iki motosikletlə gəlib və fanatlara atəş açıblar.

Sosial şəbəkələrdə yayılan videolarda silah səsləri, ardınca qaçan və qışqıran insanlar görünür. Hadisə şahidlərinin bildirdiyinə görə, cəsədlər stadionun qazonunda qalıb, yaralılar isə yaxınlıqdakı tibb mərkəzlərinə aparılıb.

Hələlik həbs olunanlar barədə məlumat verilmir, ərazidə araşdırma aparılır.