“Mançester Yunayted” “Portu”nun rekordunu təkrarlamağa yaxındır

Yarımfinalın cavab oyununda “Atletik”i 4:1 hesabı ilə məğlub edən “Mançester Yunayted” cari mövsüm Avropa Liqasında vurduğu qolların sayını 35-ə çatdırıb.

Futbolxeber.az saytının məlumatına görə, bu, turnirin tarixində ən məhsuldar üçüncü göstəricidir.

Avropa Liqası tarixində bir mövsümdə ən çox qol vuran komanda “Portu” olub. 2010/11 mövsümündə Portuqaliya təmsilçisi sözügedən turnirdə rəqib qapılarından 37 top keçirib.

2018/19 mövsümündə isə “Çelsi” turnirdə 36 dəfə fərqlənməyi bacarıb.

Bu isə o deməkdir ki, “Mançester Yunayted” finalda 3 qol vursa, Avropa Liqası tarixində bir mövsümdə ən çox fərqlənən komanda olacaq. “Qırmızı şeytanlar” 2 dəfə fərqlənsə, “Portu”nun rekorduna şərik çıxacaq, 1 qol vuracağı təqdirdə isə “Çelsi”nin nəticəsini təkrarlayacaq.

Xatırladaq ki, “Mançester Yunayted” finalda digər İngiltərə təmsilçisi “Tottenhem”lə üz-üzə gələcək. Mayın 21-də keçiriləcək həlledici qarşılaşmaya Bilbao ev sahibliyi edəcək.