Hansı komandalar Braziliyaya yollanmaq şansını saxlayır?

Gələn il Braziliyada təşkil olunacaq DÇ-2014-də mübarizə aparacaq 32 komandadan 21-i məlumdur. Futbolxeber.az-ın məlumatına görə, son 11 vəsiqənin sahibi play-off matçlarından sonra bəlli olacaq. 11 kollektivdən 4-ü Avropanı, 5-i isə Afrikanı təmsil edəcək. Digər iki vəsiqə uğrunda isə Cənubi və Şimali Amerika, Okeaniya və Asiyanın nümayəndələri mübarizə aparır. Avropada Xorvatiya, Portuqaliya, Yunanıstan, Ukrayna (ilk 4-lük), Fransa, İslandiya, Rumıniya və İsveç (digər 4-lük) play-offa adlayıblar. Burada isə ilk 4-lükdə qərarlaşan komandalar digər 4-lükdəki kollektivlə görüşəcək. Danimarka millisi də qrupu ikinci pillədə tamamlamasına baxmayaraq, az xal topladığına görə play-offdan kənarda qalıb. Digər 7 vəsiqənin taleyinə isə aşağıdakı matçlardan sonra aydınlıq gələcək: Uruqvay - İordaniya Meksika - Yeni Zelandiya Misir - Qana (ilk oyun - 1:6) Nigeriya - Efiopiya (2:1) Kamerun - Tunis (0:0) Əlcəzair - Burkino Faso (2:3) Seneqal - Fil Dişi Sahili (1:3)