Ronaldo Platiniyə söz atdı

Portuqaliya millisinin üzvü Kriştianu Ronaldo DÇ-2014-ün seçmə mərhələsi çərçivəsində play-offda qarşılaşmaq istəmədiyi komandanın adını açıqlayıb. Futbolxeber.az-ın məlumatına görə, portuqaliyalı futbolçu qalmaqal yaradacaq açıqlama verib: “Nəzəri cəhətdən mümkün rəqiblər arasında ən güclüsü Fransadı. Odur ki onlarla qarşılaşmaq istəmirik. Düzdür, bizim qarşıdurmamız çox maraqlı alına bilər. Amma bundan qaçmaq daha yaxşıdır. Fransa ilə qarşılaşmaq istəməməyimizin bir neçə səbəbi var. Amma mən bu haqda danışmaq istəmirəm. Çünki danışsam, cəzalana bilərəm”.

Ronaldo ad çəkməsə də, açıq-aşkar UEFA prezidenti Mişel Platininin fransızlara dəstək verməsinə söz atıb. Görünür, bir neçə il əvvəl İrlandiya ilə matçda Tyerri Anrinin əllə qol vurması və hakimin də buna göz yumması yaddaşlardan silinməyib.