Mahir "Konyaspor"un baş məşqçisi ilə görüşdü

Azərbaycan millisinin hücumçusu Mahir Emreli yeni komandası "Konyaspor"da ilk məşqinə çıxıb.

Futbolxeber.az saytının Türkiyə mətbuatına istinadən verdiyi məlumata görə, ölkədə baş verən zəlzələ səbəbindən Superliqa təmsilçisinin futbolçularına üç gün fasilə verilib. Dünən isə komanda bir araya gələrək mediaya qapalı məşq keçiriblər. Məşqdə M.Emreli ilə yanaşı digər yeni transfer Marlos Moreno da iştirak edib. Onlar hər ikisi "Konyaspor"un futbolçuları ilə tanış olublar. Daha sonra baş məşqçi Aleksandar Stanoyeviç yeni transferlərlə görüşərək ayaqüstü söhbət edib. O, Emreli və Morenodan gözləntilərini bildirib.

Qeyd edək ki, "Konyaspor" bu gün məşqlərini davam etdirəcək.

Xatırladaq ki, müqavilə ilə Zaqreb "Dinamo"suna məxsus olan M.Emreli Türkiyə klubu ilə bu mövsümün sonuna qədər icarə müqaviləsi imzalayıb.