Filipe Kandido: “Rəqibdən yaxşı oynadıq, amma bu, qələbə üçün kifayət etmədi”

“Sumqayıt”ın baş məşqçisi Filipe Kandido Azərbaycan Premyer Liqasının 11-ci turunda "İmişli" ilə heç-heçə etdikləri matçı (0:0) şərh edib.

Futbolxeber.az saytının məlumatına görə, mütəxəssis matçdan sonra keçirilən mətbuat konfransında üstün oyun sərgilədiklərini söyləyib:

"Balanslı oyun olacağını təxmin edirdim. Çünki indiyədək bu komandaya yalnız “Neftçi” və “Qarabağ” qalib gələ bilib. Turnir cədvəli baxımından da bizim üçün vacib matç idi. Rəqibdən yaxşı oynadıq, amma bu, qələbə üçün kifayət etmədi. Daha yaxşı qol vəziyyətləri yarada bilərdik. Rəqib kompakt müdafiə olunurdu, bu da işimizi çətinləşdirirdi. “İmişli”nin də əks-hücumlarda imkanları oldu. İlk dəfə idi ki, qol buraxmadıq. Amma məşqçi kimi qələbə istəyirdim. İkinci hissədə qol vursaq da, çox cüzi fərqlə oyundankənar vəziyyət qeydə alındı. Son 8 oyunda yalnız “Zirə”yə uduzmuşuq. Bununla belə, oyunumuzu inkişaf etdirməliyik”.

- Roy Kehatı əvvəllər əsas heyətin vacib üzvü kimi görürdük. Son vaxtlar isə onu daha çox ehtiyatdan meydana buraxırsınız. Səbəb nədir?

- Roy bizim üçün çox vacib oyunçudur. O, ağır zədədən yeni qayıdıb. Buna görə də ona tədricən şans veririk. Ötən oyunda start heyətində yer almışdı. Qarşıdakı matçlarda komandaya necə kömək edəcəyini görüb qərar verəcəyik.

- Komanda ilk “altılıq”dan uzaqlaşır. “Kəpəz”lə xal fərqinin 7-yə çatması sizi narahat edir?

- Təbii ki, ardıcıl heç-heçələr və xal itkiləri məni narahat edir. İlk “altılıq”dan uzaqlaşmaq istəmirik. Amma çempionatda komandalar arasında ciddi güc fərqi yoxdur. Hər biri digərinə qalib gələ bilər. Hazırkı vəziyyət narahatlıq doğurur. Bununla belə, yekun nəticəni gözləmək və komandanın mövsümün sonuna qədər hansı vəziyyətdə olacağını görmək lazımdır.