“Qarabağ” üzərində qələbə bizə əlavə motivasiya verir”

“Çətin oyun idi. Çox güclü rəqibə qarşı mübarizə apardıq. Ümumilikdə yaxşı oynadıq. Əks-hücumlarda rəqibə çətin anlar yaşadırdıq. Yekunda da qələbə qazandıq”.

Futbolxeber.az saytının məlumatına görə, bu sözləri “Turan Tovuz”un müdafiəçisi Xorxe Silva Azərbaycan Premyer Liqasının XI turunda səfərdə “Qarabağ”ı məğlub etdikləri oyun barədə danışarkən deyib.

Portuqaliyalı müdafiəçi 1:0 hesablı qələbəni belə şərh edib: “Bizim üçün vacib qələbə idi. Ardıcıl ikinci matçda güclü rəqib üzərində 3 xal qazandıq. Bu qələbələrə inanırdıq. Çünki “Turan Tovuz” da çempionatın ən yaxşılarından biridir”.

Silva hazırda çempionluq barədə düşünmədiklərini bildirib: “Komandamızın qarşısında böyük hədəflər qoyulub. Lakin indi mövsümün sonu, yaxud çempionluq barədə düşünmürük. Məqsədimiz hər növbəti oyunda qələbə qazanmaqdır”.

O, iddialılar üzərində qələbələrin komandaya əlavə motivasiya verdiyini vurğulayıb: “Ardıcıl üç iddialı komanda ilə qarşılaşmalarda 7 xal topladıq. Düşünürəm ki, bu, yaxşı nəticədir. “Qarabağ” üzərində qələbə də əhəmiyyətlidir. Bu qələbə bizə əlavə motivasiya verir”.