Azərbaycanda heç kimə lazım olmayan futbolçu rəsmən Serbiya klubunda

Serbiyanın "Sloboda Sevoyna" klubu yeni transferi olan Azərbaycan millisinin sabiq futbolçusu Murad Hüseynovun təqdimat mərasimini keçirib. Futbolxeber.az-ın məlumatına görə, artıq sabah Belqrad təmsilçisində debüt etmək imkanı olan 24 yaşlı milliləşən rusiyalı komandasının “Partizan”la ev oyununda meydana çıxa bilər. Ölkəmizdə “Qəbələ” və “Sumqayıt”da çıxış etmiş legioner təqdimat mərasimindəki çıxışı zamanı vaxtilə Serbiyada da oynadığını xatırladıb: “Bilirəm ki, “Sloboda Sevoyna” iddialı klubdu. Avrokuboklarda çıxış edir. Mənim Serbiyada oynamaq üzrə müəyyən təcrübəm var. 2 il əvvəl “Mladost”da oynamışam. Yeni klubumda əlimdən gələn hər şeyi edəcəyəm ki, mənə göstərilən etimadı doğruldum”.

Qeyd edək ki, "Sloboda Sevoyna" klubu cari mövsümə uğursuz start verib. Komanda keçirdiyi 4 oyunda qələbəyə həsrət qalaraq, cəmi 2 xal toplayıb və 16 komanda arasında 14-cü pillədə qərarlaşıb. Son turda komanda səfərdə "Radniçki Niş"ə 0:2 hesabı ilə uduzub. Ötən mövsüm komanda beşinci yeri tutmuşdu. Komanda dördüncü olan "Yaqodina"dan 5 xal geri qalaraq, Avroliqaya yüksələ bilməmişdi.