“Qalatasaray”: liderliyə davam

Türkiyə Superliqasında 25-ci turun oyunları davam edir.

Futbolxeber.az saytının məlumatına görə, “Qalatasaray” öz meydanında “Konyaspor”la qarşılaşıb.

Artıq ikinci dəqiqədə qapısında qol görən “Cim-Bom” ilk yarıda hesabı bərabərləşdirməyə yaxın olsa da, Qomis penaltini qaçırıb.

Əvəzində ikinci hissədə “Qalatasaray” arzuladığı qolları vurub. Əvvəlcə Qomis səhvini düzəldib. Sona 4 dəqiqə qalmış isə Sinan Gümüş qələbə qolunu vurmağa müvəffəq olub - 2:1.

“Qalatasaray” - “Konyaspor” 2:1

Qollar: Moke, 2 (0:1), Qomis, 69 (1:1), Gümüş, 86 (2:1)

Qeyd edək ki, ardıcıl üçüncü qələbəsini qazanan Fatih Terimin komandası 50 xalla liderliyini qoruyur. “Beşiktaş” və “Başakçehir”in 50, dördüncü pillədə qərarlaşan “Fənərbaxça”nın isə 47 xalı var.