"Çelsi" "Qalatasaray"ın işini çətinə saldı

"Qalatasaray"ın prezidenti Ünal Aysal, portuqaliyalı gənc ulduz Brumanın transferindəki son durumla bağlı açıqlama verib. Futbolxeber.az-ın məlumatına görə, Melo ilə 3 illik müqavilə imzaladıqdan sonra bu problemi həll edən "Cim-Bom"un gündəmindəki yeganə məsələ Brumadır. "Qalatasaray" da öz növbəsində Brumanı heyətinə qatmaq üçün artıq hərəkətə keçib. "Çelsi"nin də portuqaliyalı ulduza "elçi düşməsi" "Qalatasaray"ın işinə yaramayıb. Çünki müştərilərin artması "Sportinq"in Brumanın qiymətini qaldırmasına səbəb olub. Ünal Aysal da açıqlamasında qeyd edib ki, hələlik futbolçunun keçidini həll etmək mümkün olmayıb: "Brumayla bağlı yeni bir xəbər yoxdu. Sözün açığı, qısa zamanda da bu məsələdə yenilik olacağına da inanmıram".

Qeyd edək ki, bir neçə gün əvvəl 18 yaşlı hücumçu "Sportinq"lə yeni müqavilə imzalamaqdan imtina edib. Bu səbəbdən də Lissabon təmsilçisi Brumanı satmaq qərarına gəlib. "Qalatasaray" qarşıdakı həftə yenidən Bruma ilə görüşəcəyi bildirilir. Əlavə edək ki, Bruma ilə "Portu" klubu da yaxından maraqlanır.