“Yuventus”un 3 futbolçusu “Kalyari”yə qarşı oynamayacaq

“A” seriyasının V turunda öz meydanında “Kalyari”ni qəbul edəcək “Yuventus” qarşıdakı oyuna itkilərlə çıxacaq. Futbolxeber.az saytının məlumatına görə, Turin klubunun 3 üzvü bugünkü matçda forma geyməyəcək. “İnter”lə görüşdə zədələnən Mehdi Benatiyanın müalicəsi hələ də davam edir. Mərakeşli müdafiəçi qarşıdakı günləri də həkim nəzarətində keçirəcək.

Sami Xedira məşqçilərin qərarına əsasən istirahət edəcək. Patris Evra isə dünənki məşqdə xəsarət alıb. 35 yaşlı futbolçu bu gün müayinədən keçəcək. Yalnız bundan sonra onun zədəsinin nə dərəcədə ciddi olduğu bilinəcək.

Əvəzində uzun fasilədən sonra Stefano Sturaro “Yuventus”un formasını geyə bilər. İtaliyalı yarımmüdafiəçi AVRO-2016-nın 1/4 finalında Almaniya ilə görüşdə zədələnmişdi.

Xatırladaq ki, sentyabrın 21-də keçiriləcək “Yuventus” - “Kalyari” görüşü Bakı vaxtı ilə 22:45-də start götürəcək.