İran və Cənubi Koreya dünya çempionatına vəsiqə qazandı

Gələn il Braziliyada keçiriləcək dünya çempionatının daha iki iştirakçısı müəyyənləşib. Futbolxeber.az-ın məlumatına görə, bir qədər öncə başa çatan görüşlərdən sonra İran və Cənubi Koreya millilərinin mundialda çıxış edəcəyi dəqiqləşib. Bu iki komanda arasında Cənubi Koreyada baş tutan görüşdən iranlılar qalib ayrılıblar - 1:0. Bu nəticə ilə İran qrupun qalibi, Cənubi Koreya isə ikinci olaraq mundiala vəsiqəni rəsmiləşdirib.

Bu qrupda üçüncü yeri tutan Özbəkistan millisi isə dünya çempionatına vəsiqə qazanmaq üçün play-off matçında uğur qazanmalıdır. Özbəklərin rəqibinin adı isə bu gün axşam saatlarında baş tutacaq İordaniya - Oman görüşündən sonra müəyyənləşəcək.

Qeyd edək ki, Asiyada əvvəlki iki vəsiqəyə Avstraliya və Yaponiya yığmaları sahib çıxıblar.