Azərbaycanlı iş adamı Moldova klubunu himayəsinə götürür

Azərbaycanlı iş adamlarından biri Moldovanın “Saksan” klubunu himayəsinə götürə bilər. Futbolxeber.az-ın qol.az-a istinadən verdiyi məlumata görə, adı açıqlanmayan biznesmenin iranlı və türkiyəli ortaqlarıyla birgə komandaya sərmayə yatıracağı gözlənilir.  Bununla bağlı rəsmi razılaşma barədə qərarın gələn həftə elan olunacağı bildirilir.

Qaqauzlara məxsus olan klubun - “Saksan”ın prezidenti Qriqori Kadınov moldfootball.com saytına azərbaycanlı biznesmenlə danışıqlar apardıqlarını təsdiqləyib. “Amma hələlik yekun razılaşma əldə olunmayıb”.

Q.Kadınov bildirib ki, tərəflər ortaq məxrəcə gəlsə, azərbaycanlı iş adamı klubun sahibi yox, sponsoru olacaq.

Qeyd edək ki, “Saksan” komandası hazırda Moldova yüksək liqasında sonuncu - 10-cu yeri tutur.