Rusiya millisi və “Zenit” azərbaycanlı futbolçu barədə razılığa gəldilər

Rusiyanın U-19 millisi ilə “Zenit” klubu arasında azərbaycanlı futbolçu Ramil Şeydayevə görə yaranan fikir ayrılığına son qoyulub. Futbolxeber.az-ın məlumatına görə, “Zenit”in rəsmi saytı məsələ ilə bağlı bəyanat yayıb. Bəyanatda qeyd olunur ki, Sankt-Peterburq klubunun 4 üzvü Avropa çempionatının final mərhələsinə hazırlaşan U-19 yığmasına dəvət alıb. Onlardan 3-ü ilk gündən, yəni iyunun 22-dən millinin düşərgəsində olacaq. Lakin Ramil Şeydayev yığmaya daha gec qoşulacaq. Belə ki, “Zenit”in baş məşqçisi Andrea Villaş-Boaş Şeydayevin komandasının yeni mövsüm öncəsi ilk təlim-məşq toplanışında iştirak etməsində təkid edir. Bu səbəbdən də Şeydayev yalnız iyulun 1-də Rusiya millisinin düşərgəsinə qoşulacaq.

Qeyd edək ki, hazırda U-19-u təşkil edən Rusiya millisi 2 il əvvəl 17 yaşlılar arasında Avropa çempionu olub. Ruslar indi də həmin uğuru U-19-la təkrarlamaq istəyirlər.

19 yaşlıların Avropa çempionatı 6-19 iyul tarixlərində Yunanıstanda keçiriləcək. Rusiya millisi B qrupunda yer alıb. Komandanın rəqibləri isə Almaniya, İspaniya və Hollandiyadır.

Onu da əlavə edək ki, Ramil Şeydayev Avropa çempionatının seçmə mərhələsində bombardir adını qazanıb.