Başqırdıstan təmsilçisi ilk dəfə Premyer Liqada

Növbəti mövsümdə Rusiya Premyer Liqasında mübarizə aparacaq daha bir klubun adı bəlli olub. Futbolxeber.az-ın məlumatına görə, play-off mərhələsində “Tom”u (5:1; 1:3) üstələyən “Ufa” yüksək liqaya vəsiqə əldə edib. Bu, “Ufa”nın tarixində ilkdir. Başqırdıstan paytaxtını təmsil edən klubun əsası 2009-cu ildə qoyulub. 2013/14 mövsümünü I divizionda dördüncü pillədə tamamlayan “Ufa” play-off mərhələsində iştirak hüququ qazanmışdı. İqor Kolıvanovun komandası həm də play-offdan Premyer Liqaya yüksələn ilk birinci divizion təmsilçisi kimi tarixə düşüb.

Qeyd edək ki, Rusiya Premyer Liqasında növbəti mövsümdə mübarizə aparmaq hüququ qazanacaq sonuncu komandanın adı “Krılya Sovetov” - “Torpedo” matçından sonra bəlli olacaq. Bu komandalar arasında baş tutan ilk oyunda “Torpedo” 2:0 hesablı qələbə qazanıb.

Əlavə edək ki, Rusiya birinci divizionun mövsümün yekunlarına əsasən “Mordoviya” və “Arsenal Tula” birbaşa Premyer Liqaya vəsiqə əldə ediblər.