“Qalatasaray”ı çempion edən məşqçi Qətərdən qovuldu

Məşhur belçikalı məşqçi Erik Gerets işsiz qalıb. Futbolxeber.az-ın məlumatına görə, Gerets Qətərin “Lexviya” klubundan qovulub. Asiya Çempionlar Liqasındakı uğursuz çıxışdan sonra rəhbərlik belçikalı mütəxəssislə vidalaşmaq qərarına gəlib. “Lexviya”nın hazırda Qətər çempionatında lider olması da rəhbərliyin fikrini dəyişməyib.

Xatırladaq ki, Gerets daha əvvəl vətənində “Lyej”, “Lyers”, “Brügge”, Hollandiyada PSV, Almaniyada “Kayzerslautern”, “Volfsburq”, Türkiyədə “Qalatasaray”, Fransada “Marsel”, Səudiyyə Ərəbistanında “Əl Hilal” klublarını, eləcə də Mərakeş millisini çalışdırıb. 2005-2007-ci illərdə İstanbulda fəaliyyət göstərən Gerets, 2006-cı ildə “Qalatasaray”ı çempionluğa daşıyıb.