Güləş millimiz reytinq turnirinin qalibi oldu

Albaniyanın paytaxtı Tiranada keçirilən güləş üzrə “Muhamet Malo” turnirinə yekun vurulub.

Futbolxeber.az saytının məlumatına görə, reytinq xarakterli yarışın son günündə yunan-Roma güləşi üzrə 55, 60, 72, 82, 97 və 130 kq-da mübarizə baş tutub. Milli üzvləri son yarış günündə 1 qızıl, 2 gümüş medal qazanıb.

55 kq

Rəşad Məmmədov qırğızıstanlı Ulan Muratbek Uluya (5:1), Rəşad Məmmədov qazaxıstanlı Arsen Jumaya (9:3) və hindistanlı Lalit Lalitə (6:5) qalib gələrək finala yüksəlib. Həlledici görüşdə rusiyalı dünya mükafatçısı və 2 qat Avropa çempionu Emin Seferşayevə 1:3 hesabıyla məğlub olan Rəşad gümüş medal əldə edib.

60 kq

Nihat Məmmədli amerikalı Maksvel Hopper Blek (8:0), qazaxıstanlı Yerbol Kamaliev (6:0) və rusiyalı Suner Konunova (3:1), Nihad Quluzadə isə qazaxıstanlı Akjol Tuyakov (8:2), türkmənistanlı Azatcan Açilov (10:0) və rusiyalı dünya və Avropa mükafatçısı Sadik Lalayevə (8:0) qalib gələrək finala yüksəlib. Həlledici görüşdə komanda yoldaşını ilk xal prinsipinə əsasən üstələyən Məmmədli fəxi kürsünün ən yüksək pilləsinə qalxıb. Belədə Nihad gümüş medalı boynundan asıb.

72 kq

Ruslan Nurullayev hindistanlı Saurav Rana (9:0) və macarıstanlı Kristyan İştvan Vantsanı (5:1) mübarizədən kənarlaşdırsa da, yarımfinalda iranlı Höccət Həsən Rəzaiyə (3:7), bürünc medal görüşündə isə gürcüstanlı Avropa mükafatçısı Yuri Lomadzeyə 4:7 hesabıyla məğlub olub.

82 kq

Tuncay Vəzirzadə qazaxıstanlı Almir Tolebayevə (4:0) və qırğızıstanlı 2 qat olimpiya mükafatçısı, 2 qat dünya və 3 qat Asiya çempionu Akjol Mahmudova (5:2) gücünü göstərsə də, yarımfinalda rusiyalı Adlet Tulubayevlə (1:6), bürünc medal görüşündə isə rusiyalı İrakli Kalandiyayla (1:11) bacarmayıb.

97 kq

Murad Əhmədiyev 1/8 finalda gürcüstanlı Giorgi Meliaya sonuncu xal prinsipinə əsasən (2:2), Məhəmməd Əhmədiyev isə təsnifat mərhələsində rusiyalı Artur Sarqsyana 2:7 hesabıyla məğlub uduzub. Məhəmməd ilk təsəlliverici görüşdə amerikalı Maykl Foya (6:2) qalib gəlsə də, ikinci təsəlliverici görüşdə qırğızıstanlı Uzur Cuzupbekova (2:8) məğlub olub.

130 kq

Sərxan Məmmədov 1/8 finalda rusiyalı Ali İlyasova 1:3 hesabıyla məğlub olub. Beka Kandelaki qazaxıstanlı Alimxan Sızdıkovla Ali İlyasovu 7:3 hesabıyla üstələyib. Yarımfinalda rusiyalı Marat Kamparova ilk xal prinsipinə əsasən (1:1) məğlub olan Kandelaki üçüncü yer uğrunda qarşılaşmada finlandiyalı Elias Kuosmanenə uduzub – 0:3.

Beləliklə, millimiz cari ildə iştirak etdiyi ilk beynəlxalq yarışda 2 qızıl və 3 gümüş medal qazanıb. Yekunda 128 xal toplayan yığmamız komanda hesabında 1-ci yeri tutub. Qazaxıstan (95) ikinci, İran (89) isə üçüncü olub.