Azərbaycan Braziliya Ciu-Citsu İctimai Birliyinin ümumrespublika seminarı keçirilib

Azərbaycan Braziliya Ciu-Citsu İctimai Birliyinin təşkilatçılığı ilə Şuşanın 2024-cü il İslam dünyasının mədəniyyət paytaxtı elan edilməsi və bir zamanlar şəhərin işğal günü kimi qeyd olunan 8 may tarixinin məhz 2024-cü ildə oraya köç tarixi ilə əvəz edilməsi münasibətilə “Şuşaya qayıdış” devizi altında ümumrespublika seminarı baş tutub.

 

Futbolxeber.az saytının məlumatına görə, ictimai birliyin prezidenti Aqil Acalov ilk məqsədlərinin Azərbaycan gənclərinə vətənpərvərlik hissinin aşılanmasına, bədən tərbiyəsinin inkişafına və idmanın kütləviliyinin artırılmasına xidmət etmək olduğunu bildirib. "Hər il keçirilən tədbirlərimiz müxtəlif devizləri ilə yadda qalır. Bu dəfə isə seçdiyimiz şüar "Şuşaya qayıdış" oldu. Uzun illər boyu 8 may tarixini Şuşanın işğal günü kimi qeyd edirdik. Amma Vətən müharibəsindən sonra bu "Şuşaya qayıdış" günü olaraq tarixə düşdü”.

 

Braziliya Ciu-Citsu sənətinin Azərbaycanda banisi olan Taleh Həsənov seminarın məqsədindən və idmançıların beynəlxalq yarışlara hazırlıq prosesindən söz açıb. Onun sözlərinə görə, seminarın təşkilində məqsəd idmançılar arasında təcrübə mübadiləsi aparmaq, müəllim və idmançıları yeni beynəlxalq qaydalar ilə tanış etməkdir.

 

Kapoeyra Federasiyasının vitse-prezidenti Elgiz Əlizadə ciu-citsu və kapoeyra idman növlərinin həmrəyliyindən, ortaq maraqlardan və birlikdə görüləcək işlərdən danışıb.

 

İctimai birliyin sədr müavini Anar Səfərov isə filialların aktivliyindən, beynəlxalq yarışlarda idmançıların əldə etdiyi nailiyyətlərdən, yeni qaydalardan və gələcək planlardan bəhs edib. O bildirib ki, belə seminarların tez -tez təşkil olunması idmançıların və müəllimlərin bir arada olmasına, bir- birini yaxından tanımasına şərait yaradır.

 

Daha sonra tədbirdə qonaq olan Kapoeyra Federasiyasının idmançıları öz bacarıqlarını sərgiləyiblər.

 

Qeyd edək ki, Taleh Həsənovun təşkilatçılığı ilə ərsəyə gələn seminarın iştirakçıları arasında uşaq, yeniyetmə, və böyüklər də olmaqla ümumilikdə 100 idmançı iştirak edib. Onlar attestasiyadan keçərək müxtəlif kəmər və idman dərəcələri alıblar, eləcə də T. Həsənov tərəfindən diplomlarla təltif olunublar.