İlqar Rəhimov Beynəlxalq Paralimpiya Komitəsinin prezidenti ilə görüşüb

Almaniyanın paytaxtı Berlində Beynəlxalq Paralimpiya Komitəsinin (IPC) prezidenti Endrü Parsons və Beynəlxalq Görmə Məhdudiyyətli İdmançılar Assosiasiyasının (IBSA) vitse-prezidenti, qurumun prezidentliyə namizədi İlqar Rəhimov arasında görüş keçirilib.

 

Futbolxeber.az saytının məlumatına görə, görüş zamanı iyunun 30-da Portuqaliyanın Fatima şəhərində IBSA-nın növbəti Baş Assambleya və orada baş tutacaq seçkilər ətrafında müzakirələr aparılıb.

 

İlqar Rəhimov seçkilərdə IBSA-nın prezidentliyinə öz namizədliyinin irəli sürülməsi, eyni zamanda, hazırladığı islahatlar paketi barədə məlumat verib. İ.Rəhimov bildirib ki, islahatlar IBSA-nın fəaliyyətinin daha da genişləndirilməsi, şəffaflığın təmin olunması, görmə məhdudiyyətli şəxslərin idmana cəlb edilməsi ilə bağlı işlərin aparılması və digər istiqamətlərdə də nailiyyətlərin əldə edilməsi üçün önəmlidir. O, görmə məhdudiyyəti olan idmançıların Paris 2024 XVII Yay Paralimpiya Oyunlarında iştirakı barədə də öz fikirlərini bölüşüb.

 

IPC-nin prezidenti Endrü Parsons isə öz növbəsində İlqar Rəhimovun IBSA-da dayanıqlı inkişafı təmin etmək məqsədilə qurumda müxtəlif istiqamətlərdə bir sıra dəyişikliklər və yeniliklərin həyata keçirilməsi istiqamətində gördüyü işləri yüksək qiymətləndirərək, ona qarşıdan gələn seçkilərdə uğurlar arzulayıb.

 

Tərəflər arasında dünyada görmə məhdudiyyətli şəxslərin idmana cəlb edilməsi, xüsusilə Cənubi Amerika, Asiya və Afrika ölkələrində bu istiqamətlərdə işlərin aparılmasının vacibliyi qeyd olunub. E.Parsons bu istiqamətdə IPC-nin IBSA-ya lazım olacaq dəstəyi göstərəcəyini vurğulayıb.

 

IPC prezidenti, həm də Azərbaycanda paralimpiya hərəkatının inkişafında göstərdiyi xidmətlərə görə İlqar Rəhimova öz təşəkkürünü bildirib.

 

Futbolxeber.az-ın teleqram kanalına abunə olun