Azərbaycanı Böyük Dəbilqədə kimlər təmsil edəcək?

Azərbaycan cüdoçuları 31 mart-2 aprel tarixlərində Türkiyənin Antalya şəhərində keçiriləcək Böyük Dəbilqə turnirində iştirak edəcəklər.

Futbolxeber.az saytının məlumatına görə, 3 gün davam edəcək turnirdə 85 ölkədən 600-dən çox idmançı medallar uğrunda mübarizə aparacaq. Azərbaycan cüdo üzrə milli yığma komandası yarışda 9 çəki dərəsində 12 kişi və 4 qadın ilə təmsil olunacaq.

Cüdoçular performans direktoru Mark van der Ham, böyüklərdən ibarət yığmanın baş məşqçisi Riçard Trautman, böyüklərdən ibarət yığmanın böyük məşqçi Elçin İsmayılov, qadınlardan ibarət yığmanın baş məşqçisi Rəşad Məmmədov və böyük performans analitik Zaur Babayevin rəhbərliyi altında çıxış edəcək.

Turnirdə ölkəmizi qadınlardan (-48 kq) Leyla Əliyeva, Könül Əliyeva, (-52 kq) Gültac Məmmədəliyeva (-57 kq) Fidan Əlizadə, kişilərdə isə (-60 kq) Kəramət Hüseynov, Nazir Talıbov, (-66 kq) Orxan Səfərov, Yaşar Nəcəfov, (-73 kq) Hidayət Heydərov, Nurlan Osmanov, (-81 kq) Səid Mollayi, Zelim Tçkayev və (90 kq), Murad Fətiyev, (+100 kq) Uşanqi Kokauri və Camal Qamzatxanov təmsil edəcəklər.