Ukraynalı boksçu: “Teymur Məmmədov əlləri ilə məni “toxuyurdu”

“Teymur Məmmədovla 1/16 final döyüşüm haqda indi nəsə deməyim çətindi. Çünki özüm də rinqdə idim. Evə qayıdım, hazırda Ukraynada olan şəxsi məşqçimlə əlaqə saxlayıb, onunla birgə qarşılaşmanı təhlil edəcəyik. Məhz o rinqdə nə düzgün, nəyi səhv etməyimə qərar verəcək”. Futbolxeber.az saytının məlumatına görə, bunu ukraynalı boksçu Denis Solonenko (81 kq) deyib.

24 yaşlı idmançı Rio Olimpiadasında Azərbaycan yığmasının boksçusu Teymur Məmmədovla döyüşü şərh edib. O bildirib ki, həmyerlimizə qarşı döyüşmək heç də asan olmayıb: “Mənə elə gəlir ki, rəqibin imkan verdiyi qədər döyüşdüm, ona təzyiq etməyə, müdafiəsini sındırmağa çalışdım. Amma Məmmədov da asan rəqib deyildi. O, əllərinin uzun olması kimi üstünlüyündən çox məharətlə istifadə edirdi. Sanki bu əllərlə məni “toxuyurdu”. Qələbə üçün hər şey etdiyimi də deməzdim. Hakimlər belə qərar verib ki, mən də onları mühakimə etməyə haqqım yoxdu. Bu onların işidi. Mənim işim isə döyüşməkdi” (apasport.az).