Seymur Məmmədov: “Deməzdim ki, “Zirə”nin çempionluğu sürpriz oldu”

Minifutbol üzrə Azərbaycan çempionu olan "Zirə"nin baş məşqçisi Seymur Məmmədov final matçından sonra jurnalistlərin suallarını cavablandırıb. Futbolxeber.az saytının əməkdaşının da iştirak etdiyi müsahibəni təqdim edirik:

- “Birbaşa Bakı”nı 4:1 hesabı ilə məğlub edən “Zirə” tarixində ilk dəfə Azərbaycan çempionu oldu. Təəssüratlarınız necədir?

- Çempionluğa görə çox sevinirik. Neçə illərdir bu uğura doğru gedirdik. Allah bizə o qələbəni bu gün qismət etdi.

- “Zirə”nin heyətində futbolçu kimi qazana bilmədiyiniz çempionluğu baş məşqçi kimi qazandınız. Titulu əldə etmək üçün nələri dəyişdiniz?

- Demək olar ki, xüsusi heç nəyi dəyişmədim. Qələbə Allahdandır. Nəsib bu günə imiş.

- Bəs finalda böyük hesablı qələbə qazanacağınıza inanırdınız?

- Deməzdim ki, sürpriz oldu. Amma bu hesabla qələbə gözlədiyimi də desəm, yalan olar. "Birbaşa Bakı" tək Azərbaycanda yox, dünyada sayılıb-seçilən komandalardandır. Çempionlar Liqasını da qazanıb. Onlara qarşı oynamaq, onları udmaq sevinclidir.

- Son 4 ildə ölkə çempionatında "Birbaşa Bakı"nın hegemonluğu var idi, buna son qoydunuz. Bəs  "Zirə"nin qazanılan uğurun ardını gətirməsi nə dərəcədə realdır?

- Çalışacağıq ki, bu, birinci və axırıncı olmasın. Davamını gətirmək istəyirik. Tək Azərbaycan çempionatı ilə kifayətlənmək istəmirik. Avrokuboklarda da uğurlu olmaq niyyətindəyik.

- Qeyd etdiyiniz kimi, "Birbaşa Bakı" Çempionlar Liqasını qazana bilib. Eyni uğuru “Zirə”dən də gözləmək olar?

- Çempion olmasaydıq da, Çempionlar Liqasını qazanmağa gedəcəkdik. Növbəti hədəf bu olacaq.