Türkiyə millisinin baş məşqçisi: “Biz qazana bilmiriksə, Azərbaycan qazansın”

“Macarıstanın Ukraynanı məğlub edəcəyini gözləyirdik. Çox istərdik ki, bu baş verməsin və biz meydana rahat çıxaq. Təəssüf ki, alınmadı. Biz də İngiltərəyə məğlub olmaqla 1/8 finala yüksələ bilmədik”.

Futbolxeber.az saytına müsahibəsində bu sözləri Bakıda keçirilən minifutbol üzrə dünya çempionatında çıxışını başa vuran Türkiyə milli komandasının baş məşqçisi Tuğ Durul deyib.

“Ay-ulduzlular” qrup mərhələsinin son turunda İngiltərəyə məğlub olmaqla qrup mərhələsini üçüncü yerdə başa vurub. Buna baxmayaraq, mütəxəssis yenilgini normal qarşıladığını bildirib: “Məğlubiyyəti normal qarşılayırıq. Çünki yeni komandayıq. Dünya çempionatına qısa müddətdə hazırlaşdıq. Gələcəkdə daha yaxşı nəticələr qazanmağı hədəfləyirik”.

Türkiyə millisinin baş məşqçisi bu gün Milli Gimnastika Arenasında komandasına verilən möhtəşəm dəstəyə görə azarkeşlərə minnətdarlığını bildirib: “Azərbaycana ayaq basdığımız andan hamı bizimlə çox yaxından maraqlanır. Oteldə, küçədə, zalda – hər yerdə bizə çox xoş münasibət göstərilir. Özümüzü həqiqətən də evdəki kimi hiss etdirdiniz. Hər kəsə təşəkkürümüzü bildiririk. Bu gün də arenada bizə möhtəşəm dəstək var idi. Sizin milliniz qalib gəldi. Kaş ki, qələbə qazanıb Azərbaycan xalqına ikiqat sevinc yaşadardıq”.

T.Durul qeyd edib ki, Azərbaycan millisinin uğuru Türkiyənin də uğurudur: “Təxminən 1 ay əvvəl Monteneqroda beynəlxalq turnirdə biryerdə idik. Orada da demişdik ki, biz qazana bilmiriksə, Azərbaycan qazansın. Ona görə də Azərbaycan millisinin dünya çempionu olmasını çox istəyirəm. Komandanızın uğuruna öz uğurumuz kimi sevinirik. Hətta finalda bizi məğlub etsələr belə, məyus olmazdıq”.

İbrahim Cəfərov