25 Aprel 2024, Cümə axşamı
Zubir Liqa 1 klubunun hədəfində
U-17 millimiz Belarusa məğlub oldu
Boksçumuz ermənini məğlub etdi
Şahin Diniyevdən qələbə şərhi

Minifutbol

Elvin Məmmədov: “Boş yanaşırıq, ayılandan sonra da gec olur”

Futbol üzrə milli komandamızın keçmiş yarımmüdafiəçisi, hazırda minifutbol üzrə ölkə çempionatında çıxış edən “İnter”də forma geyən Elvin Məmmədovun Futbolxeber.az saytına müsahibəsi

 

“MİNİFUTBOL ÇEMPİONATINDA SƏVİYYƏNİN BELƏ YÜKSƏK OLACAĞINI GÖZLƏMİRDİM”

- Minifutbol üzrə Azərbaycan çempionatının X turunda “Real Bakı” ilə oyunda (3:3) qapınızda 3 qol görsəniz də, sonradan geridönüş edə bildiniz. Uğursuz startı nə ilə əlaqələndirmək olar?

- Loru dildə desək, oyunlara bir qədər boş yanaşırıq. Ayılandan sonra da gec olur (gülür). Amma bu dəfə çox yaxşı oynadıq. Bizdə elə uşaqlar var ki, 4-5 ildir futbolla vidalaşıblar. Praktika yoxluğu var. Ümumi götürdükdə, yaxşı mübarizə apardıq. Qapımızda 3 qol görsək də, hesabı bərabərləşdirdik. Hətta qələbə qolunu da vura bilərdik.

- Artıq minifutbola tam öyrəşmisiz?

- Yox, hələ tam öyrəşməmişik. Çətinliklər var. Bir qədər gənclərdən qurulmuş rəqiblərlə oynayanda çətinliklə üzləşirik. Çünki onlar çox qaçırlar, hərəkətdə olurlar. Biz isə çatdırmırıq.  

- Çempionatın səviyyəsini necə dəyərləndirirsiniz?

- Yaxşıdır. Açığı, mən belə gözləmirdim. Komandalar güclüdür. Bizə qarşı isə daha çox motivasiya olurlar (gülür). Əslində, bu da bizə xoşdur.

- Böyük futbol üçün darıxmırsınız?

- Enerjini atmaq üçün minifutboldan başqa, həftədə 2 dəfə “dır-dır” oynayıram. Eləcə də məşqçi kimi çalışdığım 15 yaşlılarla birgə məşqdə arada oynayıram. Minimum “kvadrat”larda qoşuluram.

“İNDİ KLUBLAR LEGİONER SEÇİMİNƏ DAHA DİQQƏTLİ YANAŞIRLAR”

- Azərbaycan Premyer Liqası kənardan necə görsəniz? Səviyyə qalxıb?

- Pis deyil. İlk növbədə legionerlər seçilir. Hiss olunur ki, indi klublar legioner seçiminə daha diqqətli yanaşırlar.

- Lakin “Qarabağ” yenə də üçüncü dövrənin əvvəlindən böyük ölçüdə çempionluğu təmin edib...

- Klubda çalışdığım üçün bu barədə nəsə deməyim düzgün çıxmaz. Çünki ola bilər ki, fikirlərim birmənalı qarşılanmasın.

- Veteran futbolçu kimi fikirləriniz maraqlıdır.

- Qısaca deyim ki, “Qarabağ”ın səviyyəsi hiss olunur. Razıyam ki, artıq indidən çempionluğun taleyi demək olar ki, həll olunub. Düzdür, son turda “Sabah” bir qədər Ağdam klubuna müqavimət göstərdi. Lakin çempionluq uğrunda mübarizə demək olar ki, indidən bitib.

- “Braqa” ilə matçlarda Ağdam klubunun şanslarını necə dəyərləndirirsiniz?

- İlk növbədə “Qarabağ”a uğurlar arzu edirəm. Bu gün komandanı çox çətin oyun gözləyir. “Braqa” səviyyə baxımından üstün olsa da, “Qarabağ” təslim olmayacaq. Əminəm ki, təmsilçimiz bütün gücünü meydanda qoyacaq. Komanda sərfəli nəticə qazanmaq üçün əlindən gələni edəcək.

“BU BARƏDƏ SÖZLƏRİMİZ UCUZ QALIB DEYƏ DANIŞMAQ İSTƏMİRƏM”

- Milli komandamızın baş məşqçisi məsələsi hazırda ən çox müzakirə olunan məsələlərdən biridir. Sizin fikriniz necədir: yerli, yoxsa əcnəbi məşqçi?

- İndiyə qədər bu barədə çox fikir bildirmişik. Amma sözlərimiz ucuz qalıb deyə yenidən bu haqda danışmaq istəmirəm. Kim gələcəksə, ona uğurlar arzu edirəm. Bu, bizim millimizdir.

- Son günlər indiki, yoxsa 10 il əvvəlki Azərbaycan yığmasının daha güclü olması haqda da müzakirələr aparılır. Elvin Məmmədov bu barədə nə düşünür?

- Birmənalı şəkildə nəsə demək çətindir. Çünki hansısa fikir bildirsəm, dərhal millinin qazandığı nailiyyətlər soruşulacaq.

- Hazırda Premyer Liqada legioner liminin artırılıb-artırılmaması da müzakirə mövzusudur. Artırılsın deyənlər fikirlərini belə əsaslandırırlar ki, bu halda yerli futbolçular xaricə daha çox üz tutacaqlar. Həqiqətən də bu, mümkündür?

- Xaricə getmək məsələsində pasport çox önəmlidir. Reallığı özünüz də bilirsiniz. Tutaq ki, hansısa azərbaycanlı futbolçu və braziliyalı oyunçu. İkisinin də səviyyəsi eynidir. Amma bu halda xarici klub yüz faiz seçimi braziliyalının xeyrinə edəcək. Pasport məsələsi həlledici olacaq. Yerli uşaqların xaricə getməsi üçün güc menecerlərin üzərinə düşür. Legionerlərin gəlməsində problem görmürəm. Amma gərək klublar da səviyyəli legionerlər gətirələr. Məsələn, 10 yox, 5 əcnəbi olsun, amma elə futbolçular olsun ki, komandanı çiyinlərində daşısınlar. O vaxt “Neftçi”də Vobay, Flavinyo komandanı məhz çiyinlərində daşıyırdılar. Necə deyərlər, əsl legioner idilər. Qoy klublar daha artıq pul versinlər, onsuz da futbolda hər şey pulun başındadır. Səviyyəli legionerlər olmalıdır ki, yerlilər də onlara baxıb inkişaf etsinlər. Legioner yerli futbolçudan az seçilirsə, onu gətirməyin mənası nədir?

İbrahim CƏFƏROV




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Aprel 2024
B.eÇ.aÇC.aCŞB
01 02 03 04 05 06 07
08 09 10 11 12 13 14
15 16 17 18 19 20 21
22 23 24 25 26 27 28
29 30